EDITORYAL — Suportahan ang mga awit Sugbuano

Ang Provincial Board sa Sugbo mi-aprub na sa unang pagbasa sa ordinansahon diin gimando ngadto sa tanang AM ug FM radio stations sa lalawigan ang pagpatukar sa mga orihinal nga awit Sugbuano kun Sinugbuanon.

Ang maong ordinansahon gi-isponsoran ni PB Member Victor Maambong kinsa nagkanayon nga ang mga awit Sugbuano kanunay'ng mahikalimtan sa mga estasyon sa radyo.

Ubos sa ordinansahon ni Ginong Maambong, adunay silot nga ipahamtang ngadto sa molapas sa probisyon sa ordinansa.

Daghan na ang mga nisugyot ngari kanato nga pugson ang mga estasyon sa radyo dinhi sa ato sa paggahin og oras alang sa Sugbuano kun Binisaya nga mga komposisyon kay matud nila mga tinagalog kasagaran ang patukaron sa atong mga AM ug FM station.

Manghinaut kita nga mapasar kining ordinansahon ni PB Member Maambong aron kahatagan usab og kaangayan ang atong mga komposer.