EDITORYAL — Mahal ra ang cellphone rates sa RP

Gipaninguha karon sa usa nato ka konsehal nga mapaubsan ang text messaging ug call rates sa mga cellular phone company, ilabi na ang Smart ug Globe.

Matud ni Konsehal Edgardo Labella, ang cellular phone rates dinhi sa Pilipinas mas mahal kay sa mobile phone rates sa ubang nasud sa Asia lakip na ang Singapore, Hong Kong ug Malaysia.

Adunay kapin sa 26 ka milyon cellphone subscribers sa Pilipinas karon suma pang Labella. Kini sila nag-abaga sa rate scheme sa mga telecommunications company diin mas taas kini kay sa pagabayaran sa mga cellphone subscribers sa mga adunahan nga nasud.

Nanghinaut ang Konsehal nga himuon sa gobiyerno ang pagpangita og paagi nga kahatagan og kaangayan ang mga cellphone subscribers sa nasud kinsa nakatabang pag-ayo sa kalambuan sa telecom industry.