Konsehal Carillo nanghilabot na sab?

Ang Criminal Investigation and Detection Group ( CIDG-7 ) nagkanayon nga si Konsehal Carillo mitawag ngadto kanila sa dihang mipahigayon sila sa pagronda sa usa ka stall sulod sa may Colonnade Mall nga namaligya og mga peke nga herbal ug cosmetics. Pasangil usab sa nahisgutang buhatan nga sa dihang dad-on na unta nila ang duha ka mga intsik nga ilang gidudahan nga tag-iya sa stall mitawag na usab kanila si Konsehal Gerry Carillo ug miboluntaryo sa pagkustodiya niini ug mipasalig nga mao na lamang kini ang modala ngadto sa ilang buhatan apan nabuntagan na lamang sa pagpaabot ang taga CIDG-7 wa gayoy miabot nga Konsehal Carillo kuyog ang duha ka intsik. Hinoon wa mohatag og pamahayag ang CIDG-7 pinaagi ni Chief Inspector Rex Derilo kon ang maong gihimo sa konsehal pagpanghilabot ba ngadto sa ilang gipahigayong ronda.

Sa laing bahin sa akong pakighinabi ni Konsehal Gerry Carillo kaniadtong Sabado sa gabii sa Saksi Evening Edition sa DYSS gipanghimakak niini nga nanghilabot siya sa operasyon sa CIDG - 7. Hinuon iyang giangkon nga miadto siya sa dapit diin gipahigayon ang ronda tungod kay nakadawat siya og tawag sa iyang kliyente nga kaila sa tag-iya sa stall nga gironda apan kadiyot ra man kuno siya didto ug dayon milakaw.

Ang abogado nga opisyal sa siyudad usahay maigo gayod sa komentaryo ug mga pagsaway ilabi na kon ang ilang gilabanan nagpabadlong. Sayonan mo niana nga ang gilabanan sa konsehal kadtong namaligya og mga peke nga herbal ug cosmetics? Dapat adto unta kini siya molaban sa mga nabiktima sa mga akusado.

Niining panahona lisod ang pagpangita og kwarta aron ikapalit og tambal ug aron lagi makaminos-minos sa prisyo ang uban kanato adto mopalit sa mga herbal pero kon ang mapalit nato peke madoble ang atong sakit. Sama sa kasakit nga atong gibati gumikan sa pagkailad ug ang posible pang epekto sa pagtumar sa tambal nga peke. Mao nga dapat mao ni ang tan-awon sa atong abogado nga konsehal nga si Gerry Carillo pero lahi ang iyang gihimo. Pero abogado man ugod ni siya nga nanginahanglan usab og kliyente. Pero wa na ba gyoy laing kliyente si Atty.? Bisan sa delikadeza na lang di ba gayod nato mabalibaran kanang kliyente nga gipasanginlan nga nangilad sa ilang mga kustomer?



Sa laing bahin kon kamo ang pangutan-on nanghilabot ba sa operasyon sa CIDG-7 si konsehal Carillo gamit ang iyang position sa siyudad sa Sugbo?