Ang libel bill ni Del Mar

Napasar na sa Lower House ang balaudnon nga gipangamahan ni Rep. Raul V. del Mar (Cebu City North) diin ang tumong mao ang pagpaundang na sa pagpangharas ngadtos mga periodista ug magsisibya.

Ang maong balaudnon (House Bill No. 77) nagkanayon nga ang kasong libelo usahay gigamit na karon sa ubang tawo aron harason ang mga sakop sa media.

Sa maong bill ni Rep. del Mar, ang kasong libelo batok sa usa ka periodista o magsisibya ipasaka sa Regional Trial Court sa probinsya o dakbayan diin nahimutang ang buhatan sa reporter.

Usa kini ka balaudnon nga angayang ikalipay sa mga taga media kinsa sa dugay'ng panahon giharas pinaagi sa mga kihang libelo nga adto isang-at sa mga dapit nga halayo kaayo sa gibasihan sa reporter ug sa iyang mantalaan o kaha estasyonan sa radyo.