Lain na usab nga lipat-lipat

Si Presidente Gloria Macapagal Arroyo sa iyang State of the Nation Address (SONA) miingon nga aduna nay salapi ang gobyerno nga magamit alang sa gipasigarbo niini nga Super Regions diin ang tibook nasud sa Pilipinas iyang gibahin ngadto sa lima ka mga rehiyon alang sa pagpalambo sa ekonomiya ug serbisyo. Sa iyang power point presentation impresibo kaayo nga gipakita sa presidente ang mahimong kaayohan nga atong mapaabot sa Super regions. Apan dili basta-basta ang magasto niining maong proyekto tungod kay nagkinahanglan kini og 207 bilyones ka pesos. Hinoon miingon man ang presidente nga adunay salapi ang gobyerno busa dili kita angayan nga mabalaka mahitungod sa maong kantidad.

Pero sa dihang gipangutana si Secretrary Andaya sa Department of Budget and Management kon asa kuhaa ang kwarta alang sa Super regions sa presidente, iyang gitug-an nga ang nasud mangutang og 65 bilyones ka pesos samtang ang uban pagakuhaon sa tinuig nga gahin sa gobyerno. Pagkaahak baya diay niini. Ingon anaa nay salapi ang gobyerno unya nganong mangutang man? Misool na usab ang lipat-lipat sa kagamhanang Arroyo. Garbo kaayo nga iyang gipahibalo sa iyang SONA nga aduna nay kwarta pero asa man diay nang kwartaha nga utangon pa man diay.

Gusto sa presidente nga ipaabot ngadto sa katawhan nga sa iyang administrasyon aduna nay kwarta ang gobyerno ug gani matud pa niya nga hinay-hinay na kitang nakabayad sa atong utang sa gawas sa nasud apan sa luyo niining tanan anaa man diay ang pagpangutang. Nganong dili na man lang motug-an sa tinood? Nganong ilaron pa man ta? Nganong dili man ta prankahan sa pagsulti nga hangtod karon dili gihapon makasugakod ang nasud sa paghimo og mga maayong proyekto kon dili kini mangutang?

Kon ang gobiyerno mangutang man lang alang sa pagpatuman niining maong proyekto mas maayo pa nga dili na lamang kini ihinayon sa presidente kay magdugang na usab kini sa atong bayranan. Sayod na kamo nga sa pagkakaron tungod sa kadako sa atong utang sa gawas sa nasud bisan gani kadtong mga bata nga anaa pa sa bugan sa ilang mga ginikanan utangan na og 36 mil ka pesos matag usa unya dugangan na pod? Mas maayo pa nga dili na lamang kini ihinayon kay akong nabalak-an nga kining super regions nga proyekto sa presidente basin moresulta lamang kini ngadto sa pagka super corruption.

Sa laing bahin si Mayor Teddy Ouano dili motuo sa SONA ni Presidente Gloria Macapagal Arroyo hangtod mahatag niini ngadto sa Mandaue ang gisaad sa Presidente nga 100 milyon ka pesos kaniadtong tuig 2003 alang sa housing project sa mga molupyo sa Canduman Mandaue nga nasunugan.