Kalma o way pangandam?

Miulbo ang krisis sa nasud sa Lebanon dihang gibombahan sa nasud sa Israel ang mga gidudahang kampo sa mga teroristang Hezbollah diha sa maong nasud,(pipila sa gitarget nga lugar dunay sibilyan).

Ang ubang mga nasud sama sa Pransya, Amerika, Italya, Britanya ug uban pa mipadala og mga dagkong barko, abyon ug ubang matang sa transportasyon aron hakuton ang ilang mga citizen nga naipit sa Lebanon.

Sama nila, ang Pilipinas dunay 30,000 mil ka mga OFW's nga nanrabaho didto, makita sa telebisyon kung unsa kapait ang ilang kahimtang karon, tuod man dunay duha na ka batches nga nakauli na og padulong na nganhi sa Pilipinas pinaagi usab sa Department of Foreign Affairs.

Apan kaya ba nato ang paghakot sa tanang OFW didto? Karong nisamot na ang sitwasyon? Niadtong nagsugod palang ang krisis wala dayon mo-react ang atong gobiyerno sa pagpabakwit kay nagpunay lang og pagarpar dinhi sa mga balita nga dunay contingency plans, ug mismong ang Presidente sa nasud nanawagan pa sa Hezbollah ug Israel nga di apilon ang mobakwit nga mga OFW.

Kining atong mga OFW nga gibansagang buhing mga bayani nga maoy nagpasaka sa bili sa piso kontra dolyar tungod sa ilang dollar remittances mao karoy nanginahanglan og tabang. Nakapangandam ba ta sa susamang mga sitwasyon? Nganong kanunay'ng maulahi man gyud ta? Kalma ba ta kaayo o wala gyuy pangandam?