Maayo ra nga wa ko ma pastor

Daghan ang nangyam-id sa P18 nga umento sa minimum nga suholan nga giaprobahan sa regional wage board alang sa Metro Cebu. Pwerte ra kuno kining gamaya kon itandi sa nagsakang palaliton karong panahona nga halos dili na makab-ot sa mga ordinaryong mamumuo.

Ang Associated Labor Union-Trade Union Congress of the Philippines mipagawas sa kasagmuyo niining gamay nga pagtaas sa suholan. Matud sa maong grupo nga moapelar kini aron mausab ang maong desisyon sa wage board.

Gusto sa ALU-TUCP nga ipatuman sa kagamhanan ang gipangayo sa mga mamumuo nga P120 nga umento sa inadlaw'ng suholan. Apan sa giaprobahan lamang nga P18 nga umento, hayan di na mausab ang baroganan sa kagamhanan paghatag sa taas nga umento sa inadlaw'ng suholan.

Hinuon dili nato mabasol ang mga ordinaryong mamumuo nga mangayo og dakong umento sa suholan. Bisan unsaon, dili g'yud paigo ang ilang sweldo alang sa ilang mga inadlaw nga panginahang-lanon.

Gani, ang minimum nga suholan dinhi sa Metro Cebu dili paigo nga mabuhi sa hamugaway ang usa ka mamumuo sulod sa usa ka adlaw, unsa pa kaha kon aduna siyay pamilya nga gibuhi? Ug kinahanglan lamang nga matagad sa gobiyerno kining mao nga problema aron dili kini mosangpot ngadto sa anarkiya.

Apan dili usab nato mabasol kon mao ra kini ang mahatag nga umento sa kagamhanan. Kini gumikan usab sa krisis nga nasinati sa mga magpapatigayon karon nga maoy hinungdan sa pagkalugi sa uban sa ilang mga negosyo.

Bisan unsaon, dili gayud kaya sa sektor sa mga magpapatigayon ang P120 nga umento sa inadlaw'ng suholan sa mga mamumuo. Kon aduna may makahatag, pipila lamang sila nga adunay dagkong kita sa ilang mga patigayon.

Apan bisan pa man niini, kinahanglan gayud nga mohimo og lakang ang kagamhanan aron makorehian kining nagkadakong gap tali sa nagkamahal nga palaliton ug sa nagkaubos nga bili sa inadlaw'ng kita sa mga ordinaryong mamumuo.

Kaniadto, bisan gamay lamang ang inadlaw nga kita apan wala maglisod ang katawhan sa ilang pamuyo. Kini tungod sa ka ubos usab sa presyo sa mga palaliton nga kaya kaayong maabot sa ilang bulsa.

Apan karon, dagko man tuod og sweldo ang uban apan kulang gihapon kini sa ilang inadlaw'ng pamuyo, ilabina kon aduna silay dakong pamilya nga gibuhi. Kini gumikan usab lagi kay maglisod na ang ilang kita pagkab-ot sa nagsakang presyo sa mga nag-unang palaliton.

* * *

Wala ko magdahom nga usa ako sa makadawat og pasidungog atol sa kasaulogan sa ika-87th nga anibersaryo sa The Freeman sa niaging semana. Dako kong katingala gumikan kay wala koy ideya nga makadawat og award gikan sa management isip usa sa mga outstanding nga empleyado.

Hinuon, ikaduha na nako kini nga pasidungog gikan sa kompanya. Ang una kaniadtong usa pa ako ka desk editor sa The Freeman Mindanao pipila na ka tuig ang nakalabay.

Isip copy editor sa The Freeman, wala koy kalibotan nga napilian diay sa management ang akong ordinaryong trabaho sulod sa newsroom. Ug takos akong nagpasalamat kanila tungod sa maong pasidungog kay mao kini ang nagtukmod kanato paggakos pag-ayo sa akong trabaho.

Wa koy ambisyon nga mahimong journalist. Sukad pa sa akong pagkabata, pangandoy ko na ang mahimong pastor sa Seventh-Day Adventist.

Apan ang akong pagkabuloyagon usahay maoy nagduot kanako palayo sa akong ambisyon pagka-ministro sa simbahan. Maayo ra sad. Kay kon na pastor pa ron, di ko makadawat og pasidungog gikan sa among simbahan.