Apan kon dunay laing tawo nga maghimo niini, unya ang gamiton nga Sim Pack mao ang mga pre-paid, sangod og masakpan o kaha mahibaw-an kinsa ang nagpadala.
Ang kalainan sa "regular line" ug sa "pre-paid" mao nga rihestrado ang ngalan kinsa ang naghupot sa regular line nga simpack, samtang wala marehestro kinsa ang naghupot sa mga pre-paid simpack.
Dihang si ginang Margot Osmeña mireklamo ngadto sa National Bureau of Investigation (NBI) sa subsob nga pagpadala kaniya og law-ay nga mensahe pinaagi sa short messaging system kon text, dali ra nga nailhan.
Pagsusi sa NBI didto sa Globe Telecom pinaagi sa mga kaila nila, nahibaw-an nga ang numero sa cellphone narehestro ngadto ni Lorelie Rama ug si Rama dihang giimbistigar mitug-an kinsa ang migamit sa cellphone.
Ang sitwasyon mao nga si Rama maoy miaplay sa Globe kay disqualified man niadto si Rodriguez nga maka-apply og regular line.
Gituki kini nako pagbalik kay hangtod karon kon mopalit ka og simpack, pwerte gihapon ka lugak. Bisan kon pangutan-on ka pa og ngalan apan walay proper identification, malutsan gihapon.
Hinoon mora'g may lakang na nga gihimo si higalang Danny Sy, ang regional director sa National Telecommunications Commission (NTC) dinhi sa Central Visayas.
Maayo unta og mahimoan dayon og kausaban nga kadtong mopalit og pre-paid nga simpack, pangitaan na g'yod og credentials. Kini aron nga kon ang ilang simpack gamiton sa binuang, mahibaw-an dayon kon diin gikan.
Kinahanglan nga kon mahitabo nga mahanaw ang simpack gikan sa tag-iya, mo-report dayon sila sa NTC aron nga i-block ang maong simpack og dili na magamit. Kon dili sila mo-report, isipon nga sila gihapon ang migamit niini.
Unsay inyong ikasulti, dili ba maayo? Ako makadaghan na g'yod mabiktima sa mga binuang nga text messages nga gipadala nako. Ang nakaayo lang kay dili ko langasan nga pagkatawo.
Kanang pagpanghulga nga klaro kaayo nga gikan sa mga tawo nga maigo sa atong gituki nga isyu, ipalapos lang nako na sa pikas dunggan apan makapadugang sa akong kaigmat.
Tinuod, negosyo kini sa mga igsoon nato nga Muslim, ug sa bisan mga Sugboanon nga igo lang nanginabuhi. Apan, unsaon nga illegal man ang ilang gihimo.
Tukma ang gihimo sa mga deputized agents sa Media Optical Board nga matag karon ug unya mohimo'g operation batok sa mga tigbaligya niining mga pirated VCD's ug DVD's.
Tiaw mo, hapit tanang aseras dinhi sa dakbayan kon mosuroy ka, makakita ka g'yod og mga namaligya niining maong mga illegal nga produkto.
Unya, kining mga tawhana wala pa gayod magbayad og business tax aron makasapi ang kagamhanan sa ilang negosyo. Sa laktud, tukma lang nga sila himoan og kampanya.