Kuhaan og paa, pako?

Padayon sa pagdagsang ang mga reklamo batok sa mga letsonan. Dili man god diay kay usa ra ka letsonan ang naghimog tinonto ngadto sa ilang mga kustomer kondili daghan gayod. Kon maoy atong tuohan ang bersiyon sa mga reklamante, klaro nga nanikas ang mga letsonan.

Usa ka magbabasa niining lindog mi-text nga nagkanayon: "Reklamo ko nianang namaligya og letson manok. Dili lang kay letson baboy, pati usab ang letson manok. Kon mopalit ka og tibuok nga letson manok, ilang kuhaon ang paa ug pako. Sa akong pagkadiskubre, wala gyod ang paa ug pako sa letson manok nga akong gipalit. Kinahanglan nga susihon ang mga letsonan tungod sa ilang modus operandi." -- 0919-7987349 (June 14, 2006 -- 14:06:28)

Aron dili kamo mabiktima, bantayi gyod ninyong maayo ang nagbaligya kon ugaling inyong ipatadtad ang letson nga inyong paliton. Ayaw na pod kamog palit og letson nianang mga letsonan nga tikasan. Angayan tuod nga susihon kini aron masuta kon unsa kini ka tinuod ug kon mamatud-an nga naghimo silag tinonto, kinahanglan nga mahimoan sila og tukmang lakang.

Dili man god kini makiangayon ngadto sa mga kustomer. Mao nga awhagon nako ang mga tag-iyag letsonan sa pagbantay sa kalihokan sa ilang mga trabahante. Basin wala kamoy kasayoran nga naghimog binuang ang inyong mga trabahante ngadto sa inyong mga kustomer. Makadaot baya kining kalakiha sa inyong negosyo.

* * *

Sa laing bahin: "Bahin sa Smart nga magpadala og logo, tones ug kanang 209 nila. Makuhaan og dako ang load. Bisan wala ko nag-request og tones padad-an gyod ko. Unya dako ang makuha sa load. Dili man maayo ang gibuhat sa Smart. Ilang promo dili makaayo nato kay makuhaan man ang atong load." -- 0921-4599360 (June 15, 2006 -- 01-12:53)

Dili gyod kini makaayo kondili puwerhisyo ang ikadulot niini ngadto sa mga subscriber tungod kay makuhaan man ang load sa subscriber bisan wala siya mag-request. Mao ra untay angay kuhaan og load kadtong mo-request sa ilang promo.

* * *

(Sumbong ug reklamo? Text sa 0910-8105522)