EDITORYAL — Kalinaw ug kahusay ang tumong

Ang barangay Carreta ning dakbayan mipasiugda og programa nga ilang gitawag og "Oplan Bantay Silingan Magpakabana sa Terorista."

Kini dunay kalabutan sa preparasyon alang sa Asean Summit nga ipahigayon dinhi sa Sugbo unya sa Disyembre ning tuiga.

Ang katuyoan niini mao ang pagpaniid ug pagpakgang sa mga kalihukan nga makahatag og kasamok sa barangay ug sa dakbayan.

Ubos sa maong programa gilambigit dinhi ang mga tag-iyag establisamento, mga opisyal sa simbahan, ug mga kadagkoan ug lumolupyo sa mga sityo ug sa barangay mismo.

Maayo kining programaha apan wala ba kini moduplikar sa tumong sa "Oplan Pakigsandurot" nga gimugna na sa kagamhanan sa dakbayan sa Sugbo diin mag-interaksiyon ang mga opisyal sa barangay, kapolisan, ug uban pang mga tinugyanan sa balaod ug diin ang katuyoan mao ang pagkab-ot sa kalinaw ug kahusay sa kabarangayan.

Hinuon angay'ng pikpikon sa abaga ang mga opisyal sa barangay Carreta sa ilang pagpasiugda sa ilang "Oplan Bantay Silangan" kay mipakita kini sa ilang dakong tinguha sa pag-angkon og peace and order sa ilang balangay.