Kampeyon sa media

Ang Cebu Citizens-Press Council (CCPC) mainitong nihangop sa duha ka balaodnon nga manalipod sa media gikan sa di makiangayong pagpanghasi. Ang mga balaodnon nga pulos gipangamahanan ni Kongresista Raul V. Del Mar sa amihanang distrito sa Dakbayan sa Sugbo napasar na sa House of Representatives ug kinahanglan na lang dasonan sa Senado:

o Ang House Bill No. 2960 mohatag og katungod sa mga magsisibya pagdumili pag-ila sa tinubdan sa ilang balita; ug

o Ang House Bill No. 77 magmando nga ang mga kaso batok sa media mapasaka lang sa mga dapit diin nanukad ang operasyon sa media organization.

* * *

Ang resolusyon pagpaluyo sa mga balaodnon nga gipasaka ni Atty. Pachico A. Seares sa Sun.Star Daily giaprobahan sa tanang nanambong sa tigom sa CPPC sa MBF Cebu Press Center sa Sudlon, Lahug gahapon. Malaumon si Seares nga kon maminawng mga senador mapirmahan na sa presidente ang duha ka balaod sa di pa matapos ning tuiga. Hingpiton pagtuki ang mga implikasyon sa mga balaodnon atol sa pagtimaan sa Broadcasters' Month ug Press Freedom Week karong Septiyembre.



Angayang pasidunggan si Del Mar ug iyang kaubanang kongresista sa ilang pagpunit sa kawsa pagpanalipod sa media gikan sa managkaluhang mga hulga-ang una nataligam-an sa kadaghanan, samtang ang ikaduha giantos sa mga sakop sa media sa Sugbo ug ubang lalawigan sa daghan nang katuigan.

* * *

Ang HB 2960 mousab sa "Sotto Law" nga nanalipod sa mga peryodista gikan pinugsanayng pagpatug-an sa ilang tinubdan sa balita gawas lang kon ang hukmanan o Kongreso makatino nga gikinahanglan ni pagpanalipod sa nasudnong seguridad. Ang wa mahibaw-i sa kadaghanan mao, ug salamat nga nagmata sag buntag ang mga nakabangga sa mga magsisibya, nga ang balaod nanalipod lang diay sa publishers, editors, columnists ug reporters sa pamantalaan. Way labot ang mga magsisibya.

Nipasabot si Del Mar nga nahitabo ni kay sa pagpasar sa balaod ang mga sibyaanan wa pay balita, nagsige pag drama ug patokar og musika, ang news ug wire agencies wa pa mapalambo ug ang Internet publications wa pa gani madamgohi. Matod niya angayng tapakan kining dakong haw-ang kay angayng panalipdan ang mga magsisibya ug ang bag-ong matang sa mga peryodista tungod sa mahinungdanong papel nga ilang gihuptan, uban sa mga haligi sa mga pamantalaan, pagpalambo sa nasud.

* * *

Ang HB 77 mosulbad sa mas dayag nga suliran. Daghan nang mga sakop sa media ang nabiktima sa malisyusong mga nangiha nilag libelo sa labing lagyong mga dapit. Klarong tuyo mao ang paglisudlisod lang gyod sa mga sinumbong.

Matud ni Del Mar angayng panalipdan ang mga sakop sa media-labi nang mga kawani sa gagmayng mga pamantalaan ug mga sibyaanan sa mga lalawigan-gikan sa panaugdaog sa mga nagpahimus sa buslot sa balaod.

* * *

Email: [email protected]