Hustisyang giahak

Ang panel of prosecutor nga nagtuon sa kasong pagpanglugos nga giatubang ni Fr. Joey Belciña miingon nga ang pari wa manglugos sa nagreklamo. Matud pa sa prosecutors nga adunay pagtugot sa reklamante ang pagpakighilawas sa pari ngadto sa nagreklamo, nga sa ato pa sinabutan sa duha ang ilang pagtagay sa lawasnong kalipay. Tungod niini ang prosecutor mibasura sa kasong pagpanglugos. Hinuon ang prosecutor mirekomendar sa pagpasaka og kasong child abuse batok sa pari tungod kay minor de edad pa ang reklamante sa dihang gidimdim sa pari ang langitnong kalipay.

Ang pagbasura sa kasong pagpanglugos nga giatubang ni Fr. Joey Belciña maoy bunga sa nagkabagat nga influencia sa Simbahang Katoliko ug politiko. Sa akong pagtuo gibasura ang kasong pagpanglugos tungod kay nahadlok ang prosecutor sa Simbahang Katoliko pero aron sa ingon dili madismaya ang reklamante nga gisuportahan og politiko mao nang mirekomendar usab kini nga ang pari pasakaan og kasong child abuse. Tungod niini, ang merito sa kaso dili maoy mipatigbabaw kon dili ang influencia. Kining maong pagtuo walay malisya ngadto sa simbahan, politiko ug mga piskal nga naghupot ning kasoha.

* * *

Dugay ra nga giabsuwelto sa kasong lugos ug pagpatay ang managsuong Maximo ug Concordio Laputan apan hangtod karon gihikaw pa gihapon kanila ang ilang kagawasan tungod sa laing kasong ilang giatubang, kaso nga ang police mismo ang mga nagreklamo tungod kay misukol ang duha sa dihang gidakop kini gumikan sa kaso gihapon ni Mylene Laputan.

Dili usab madawat sa managsuon ang dies mil ka pesos nga gihatag kanila sa hukmanan tungod kay matud pa sa Departamento sa hustisya nga kadto lamang kasong gikonbikto ang akusado sa regional trial court ug gibali ang hukom niini sa Court of Appeals ang makadawat og salapi gikan sa atong gobyerno tungod sa paghikaw kanila sa kagawasan nga walay basihanan.

Kining maong patakaran nga gisunod sa atong departamento sa hustisya dili makiangayon ngadto sa mga napriso nga inosente sa kaso nga ilang giatubang. Unsa man diay buot ipasabot niini sa DOJ, nga walay unjust detention ngadto sa managsuong Laputan tungod kay ang regional trial court lamang ang nag absuwelto kanila sa kaso ug dili ang court of appeals? Pagka ahak baya ning atong hustisya.