Ang kaso sa mga Laputan

Labihan gayud ang unos nga midangat sa managsuong Maximo ug Concordio Laputan. Si Concordio, kinsa tungod sa maaghop niyang kasingkasing, naluoy ug mipapuyo sa usa ka Ronnie Tabora nga dili gani niya igbahog paryente, nag-antos sa sulod sa bilanggoan tungod sa mga tumo-tumo niini batok kaniya.



Dili tiaw ang mga pasangil. Gisumbong si Concordio nga usa sa milugos sa hilabihan ka linuog nga paagi sa iyang kaugalingong pag-umangkon, ug pagkahuman, mipatay pa gayud sa biktima. Kining tanan gihan-ok kang Concordio samtang nagbangutan pa kini sa pagkamatay dili pa lang dugay sa iyang asawa.

Walay kasudlan ang tumang kagul-anan ni Maximo dihang ang iyang anak gilugos ug gipatay didto sa Carcar. Sa dihang gi-interbyo si Maximo sa mga sakop sa media, wala niya kapugngi ang pagdanguygoy tungod sa nahitabo sa iyang pinalanggang anak. Apan, samtang nagbangutan ang pamilya sa maong hitabo, wala damha nga sila gisikop sa mga pulis sa Carcar tungod sa pasangil ni Ronnie Tabora nga sila mismo si Maximo ug Concordio maoy mihimo sa salaod. Gitanggong sila sa bilanggoan sulod sa pipila ka bulan hangtod nga napamatud-an ra gyud sa piskaliya pinaagi sa Motion To Dismiss nga gi-file niini sa korte ug pagpresentar og mga testigos, nga dili sila mao ang nagbuhat sa salaod.

Hangtod karon, nagdumili gihapon ang mga pulis sa Carcar sa pag-angkon nga dili ang maong mga managsuon ang sad-an sa krimen. Gani misulti ang usa kanila nga mangita pa silag dugang ebidensya batok sa managsuon. Kini bisan pa ug duna nay double jeopardy tungod sa pag-uyon sa korte sa Motion To Dismiss nga gi-file sa piskaliya.

Gipasanginlan ang piskaliya nga maoy nakaingon sa gidangatan sa mga Laputan. Apan bisan pa sa mga pasangil nga wala magsubay sa records ug mga dokumento, walay mituo niini, kay kining kasoha gisubay sa media busa walay natago sa katawhan bahin niini. Ang piskaliya nagtamod sa ilang katungdanan ug mihimo kutob sa ilang mahimo aron pagtuman sa maong katungdanan. Ang mga dokumento nagmatuod nga han-ay ug paspas ang aksyon sa piskaliya, ug kon kini nalangan man, dili kini tungod sa piskaliya. Kon nganong natuis ang mga panghitabo aron ipahid sa piskal ang sala, walay usang nasayod.

Dili ikalimod nga ang naninguha nga ma-dismiss ang maong kaso mao mismo ang piskaliya, pinaagi sa pag-file sa Motion to Dismiss human masumiter sa Commission On Human Rights ang usa ka pinanumpaang Extra-Judicial Confession ni Ronnie Tabora. Gani, sa paninguha sa piskaliya nga mapadali ang kaso, mipresentar kining upat ka testigos sulod lamang sa usa lamang ka bista.

Sa pag-file pa lamang sa Motion To Dismiss sa kaso batok sa mga Laputan, ang piskaliya nakadesidir na sa pagtabang kanila aron sa posibleng paghatag og gamay nga hinabang kanila gikan sa Board of Claims, apan kini nag-agad lamang sa resulta sa Motion To Dismiss nga gipasaka sa korte.

Salamat na lang nga daghan ang nagpakabana ug mitabang sa maong kaso. Daghan ang mga higayon nga ang mga sakop sa Commission On Human Rights miadto sa Carcar aron pag-interview og mga testigos ug pagpangita og ebidensya. Dako kaayo og natabang ang maong opisina aron mapasaka ang kaso batok kang Ronnie Tabora ug ma-dismiss ang kaso batok sa managsuong Laputan.

Dako usab kaayo ang natabang sa media. Pinaagi sa mga pakisusi sa taga-media, miangkon gayud si Ronnie Tabora sa iyang gibuhat. Kon wala pa kini mahibaw-i pinaagi sa media ang kalabutan ni Tabora sa maong krimen, hayan, nagpabilin pa ang mga pasangil batok sa mga Laputan.

Nagpadayon pa hangtod karon ang panglimbasog sa mga Laputan nga makab-ot ang hustisya. Hangtod nga dili mapamatud-an sa korte ang tinuod nga mamumuno kang Maylen, haw-ang gihapon ang tanan. Kay ang pagkalingkawas sa mga Laputan sa maong kaso mao lamang ang kadaugan sa inhustisya ngadto kanila, apan ang inhustisya ngadto kang Maylen wala pa makab-ot.

Alang sa inyong opinyon ug reaksyon, palihug e-mail sa [email protected] o text sa 0915-5536986. Daghang salamat.