Selda elektrika

Nagtuo ko nga human hatagi ug temporaryong kagawasan si kanhi Dinagat Mayor Ruben Ecleo Jr., dili na maputos sa kontrobersiya ang Bagong Buhay Rehabilitation Center. Apan sa paggawas ni Ecleo sa maong bilanggoan, wala mawala ang mga isyung kanunay'ng nagbutang sa BBRC sa mga mantalaan, radyo ug telebisyon.

Dako ang pagtuo kaniadto nga sa matag bag-ong warden nga mohupot sa BBRC adunay kabag-uhan ug kalamboan nga mahitabo sa pagpadagan sa kontrobersyal nga bilanggoan. Apan sa matag tawo nga molingkod sa pwesto, isyu ang kanunay nga sagubangon sa matag jail warden. Gikan pa sa panahon ni Ecleo kung diin isyu kaniadto ang giingong pagdawat og suhol sa mga jailguards bugti sa espesyal nga pagtratar nga si Ecleo.

Apan lahi ang nahitabo. Matag warden nga mosulod sa BBRC aduna gyu'y bawnong kontrobersiya sa iyang pagbiya sa maong bilanggoan. Naputos sa isyu ang BBRC gikan sa kurapsyon hangtud sa pagpoga sa mga binilanggo hangtud sa pagdinunggabay. Apan ning bag-o, mas makapanlibawot sa balhibo ang pagkamatay sa lima ka mga piniriso human makuryentihi sulod sa holding room nga gipagamit kanila.

Daghang mga pagduda ang mitumaw tungod ning bag-ong panghitabo sa BBRC. Apan kusganong gipanghimakak sa kadagkoan sa bilangguan nga gituyo pagkuryente ang maong mga binilanggo. Bisan og unsa pang klase sa pagtabon, pagpanalipod ug pagsagang sa maong isyu, dili na mahibalik ang kinabuhi sa lima ka mga piniriso. Matud pa sa pito ka mga binilanggo nga nakalingkawas sa trahedya, hinanok nga nakatu'g sa bugnaw nga sawog ug huot nga selda elektrika ang mga nakalas nga binilanggo.

Lain na usab nga sagpa sa mga taga Bureau of Jail Management and Penology ug sa lokal nga kagamhanan sa Dakbayan sa Sugbo. Ang pagkamatay sa lima ka mga binilanggo maoy tataw nga timailhan sa kabulok ug kabati sa pagpadagan sa maong bilangu-an. Gawas nga baho, naghuot, ug tinubdan sa ilegal nga droga ug uban pang dili maayong kalihukan ang maong dapit, karon nahimo pa ning killer jail.

Daghan na nga mga kaso sa patay ang nahitabo tali sa mga piniriso sud sa BBRC kaniadto. Apan ang pagkakuryente sa dose ka mga piniriso ug pagkamatay sa lima kanila, maoy usa ka panghitabo nga nagpakita sa pagka-iresponsable sa mga tawo nga angayang motan-aw sa kaluwasan sa mga suspek nga nag-atubang pa og mga kaso ug wala pa masintensyahi kung sad-an ba o dili sa mga kasong ilang giatubang.

Katungod ni bisan kinsa, bisan mga binilanggo ang magpuyo sa usa ka lugar nga luwas. Dili ba pagyatak sa katungod sa mga binilanggo ang pagpapuyo kanila sa usa ka gamay'ng lawak uban ang napulo ngadto sa kinse ka mga binilanggo? Tawhanon ba ang gihimo sa mga taga BJMP nga gipahigda ang mga piniriso sa sawog nga bugnaw nga walay banig o karton man lang nga manalipod kanila gikan sa sakit? Makatarunganon ba nga mabutang sa dakong peligro ang kaluwasan sa mga piniriso tungod sa delikadong koneksyon sa kuryente?

Dugay nang gipanawagan nga ibalhin ug mas dako, mas high-tech ug mas luwas nga bilanggoan ang liboan ka mga piniriso sa BBRC nga nagpunsisok sa ilang mga selda. Apan matud sa mayor, dili solusyon sa problema sa BBRC ang pagbutang sa mga piniriso sa mas hamugaway nga dapit. Gani, gituhoang hulga pa sa kalinaw sa mga taga Kalunasan kon o galing ibalhin ang bilanggoan sa maong barangay.

Ang pangutana karon, igo naba ang kinabuhi sa lima ka mga binilanggo aron mausab ang baruganan sa liderato sa syudad? Padayon ba nga magmagahi ang mga opisyal tungod sa pagtuong wala sa bag-ong prisohan ang kausaban sa pagpadagan sa kontrobersyal nga BBRC apan anaa sa pamunoan sa mga jailguards ug sa mga piniriso mismo?