BridgeCom sa Globe

Ang Globe Telecom nakig-alayon sa ABS-CBN Bayan Foundation, Inc. paghatod og business training development program nga gipahaum pagpalambo sa kaantigohan sa natad sa liderato ug negosyo ngadto sa mga lider sa barangay ug mga gagmay'ng negosyante sa Cebu.

Mga 90 ka partisipante sa 30 ka barangay ang nabulahan sa maong training nga gihimo kagahapon sa Metro Park Hotel sa Lahug, ning dakbayan. Mga mamumulong gikan sa Dapartment of Agriculture, Philippine Institute of Traditional and Alternative Health Care, Municipal Agriculture Office sa San Fernando, Cebu ug Department of Science and Technology, ABS-CBN Bayan ug Globe Telecom ang nakigbayloay og ideya kabahin sa negosyo nga haum sa barangay.

Gawas sa pagplano, financial management, ug uban pang pamaagi sa pagpananum og prutas ug utanon, herbal nga medisina ug pagpanggama og sabon, pagpamutos niini, gitanyag sa Globe nga labing hayag nga negosyo nga mao ang Globe AutoLoad Max (AMAX). Gihimo kini pinaagi sa programa sa maong kompaniya nga Bridging Communities (BridgeCom sa Bayan).

Angayang suportahan ang maong programa tungod kay nakatabang na kini sa nagkalainlaing barangay sa Luzon, Kabisay-an ug Mindanao. Sa 2005 lamang, sobra sa 1,200 ka lider sa barangay ug 700 ka mga babayeng negosyante gikan sa 400 ka barangay sa nasud ang natabangan sa maong programa.

Isip bawos tungod sa pag-patronize sa ilang produkto, ang BridgeCom, sumala pa ni Jones Campos, pangulo sa Public Relations sa Globe, tipik sa corporate community relations program pinaagi sa pagserbisyo sa mga komunidad diin nag-operate ang Globe.

Sentro niining programa ang pagpalambo sa kapabilidad sa mga barangay pagpadagan og negosyo.

Adunay unom ka mga proyekto nga ubos niining BridgeCom sa Globe, kini mao ang BridgeCom sa Bayan, BridgeCom Storybooks sa mga daycare centers, BridgeCom IT Development, BridgeCom Medical Missions and Medicine Donations, ug BridgeCom Disaster Response.

* * *

PAROJINOG. Wala madala sa inasal ang mga bokal sa hunta probinsiyal sa Sugbo nga gidalit ni Collector Purita Parojinog niadtong pagpasar nila en masse sa resolusyon nga iduso ang babayeng collector isip district collector sa Bureau of Customs - Cebu, hulip kang District Collector Ma. Lourdes Mangaoang.

Maisip na nga gibakwi sa mga bokal ang ilang pag-uyon sa resolusyon ni Bokal Antonio Almirante pag-endorse kang Parojinog. Ilang nasota nga dili kuwalipikado si Parojinog nga mamahimong kolektor sa Port of Cebu tungod kay nasota nila nga Collector II lamang kini ug ang Cebu nagkinahanglan nga Collector V o VI. Si Parojinog usa lamang ka hepe sa usa ka division sa Port of Manila.

Wala madala sa tubag ni Parojinog ang mga bokal sa dihang miingon kining sulayan lamang siya nga modala sa adwana, kun dili niya makuha ang koleksiyon sulod sa tulo ka bulan, mo-resign siya.

Unsa man kahay tuyo ni Parojinog nga gihaguan man gyud niya ang pag-anhi sa Cebu niadtong Lunes (biniyaan iyang trabaho sa Manila) arong lang pag-atubang sa hunta probinsiyal aron lang mailog ang posisyon nga gihuptan karon ni Mangaoang?

Nagtuo ang pipila nga dugay nang nagpaniid sa lakat sa adwana nga dili kabubut-on ni Parojinog ang pagpamugos nga makalingkod sa Cebu kun dili buhat sa mga tawo nga gustong moilog sa puwesto apan napakyas tungod kay wala makatandog ni Mangaoang.

Kun natandog pa, dugay ra untang naibot si Mangaoang sa puwesto kaniadto pang si Collector Grace Karingal iyang kontra. Si Karingal igsuon ni Chief State Prosecutor Jovencito Zuño nga adunay koneksyon sa Malacañang.

Gikaulaw gani ni Customs Commissioner Napoleon Morales ang tinguha ni Karingal nga mabutang sa Cebu sa milabay'ng pipila ka bulan tungod kay ang Customs Personnel Order nga iyang gipirmahan na-stale man tungod kay gi-aplayan ni Mangaoang og temporary restraining order gikan sa Court of Appeals.

Ang labing maayong buhaton ni Parojinog mao ang paghikay sa iyang promosyon kun mahimo pa. Magpa-promote una siya pagka-collector V o VI aron mabutang siya sa Cebu.

May kahigayonan pa siya kun dili siya retirada.

Kun may kuwalipikasyon lang siya, hayan giduso na sa hunta probinsiyal ang ilang endorsement ngadto sa presidente aron siyay molingkod sa Cebu pagpangulo sa adwana pagkolekta sa mga buhis gikan sa mga imported nga kargamento aron ma-abag-abagan ang kagamhanang nasyonal pagtigum og pundo pangbayad sa atong mga kautangan sa gawas sa nasud ug pag-finance sa mga proyektong wala nato kinahanglana ug niadtong mga proyektong atong gikinahanglan.