Ang akong ikatambag mao nga ayaw dayon kamog tuo niana. Basin og gipalapdan na gayod ang modus operandi sa text scam mao nga may mga tawo nang manungko sa kabalayan. Ang maayong buhaton mao nga pangitai kanang babayhana og ID ug ubang mga dokumento nga magmatuod nga konektado gayod siya sa GMA Foundation.
Ayaw gayod kamo paghatag bisan unsay pangayoon sa maong babaye. Nakabalita ra ba ko nga ang maong babaye mangayo og dakong kantidad isip processing fee sa pag-claim sa premyo. Siya gayod (kuno) ang mangunay sa pagproseso aron madali ang pag-claim sa premyo sa gipadad-an og congratulatory message.
Kini gong GMA Foundation kanunay gigamit sa mga tawong nagpasiugda sa text scam. Dako ang akong pagtuo nga walay koneksiyon kining mga tawhana sa maong foundation. Gigamit lang nila ang ngalan sa GMA Foundation aron mahimong credible ang ilang pagpangilad. Ug karon may babaye na gyod nga magsuroy sa pagpanungko sa kabalayan niadtong nakadawat og congratulatory message. Ayaw'g kompiyansa! Naghitak ang pangilad karong panahona.
Gipatik ko kining maong text dili tungod kay mituo ko nga tinuod kining pasangil sa atong texter. Ako kining gipatik sa tuyo nga mabuliskad kon tinuod man nga naghimong salawayong buhat ang pipila ka polis sa lungsod sa Catmon ug aron usab masusi kon unsa kini ka tinuod.
Bukas kining lindog alang sa pagpasabot sa mga polis sa Catmon sa ilang habig. Bukas usab kita alang sa dugang kompirmasyon kon tinuod ba gayod o dili kining text nga akong nadawat. Kamong taga Catmon, text kuno mo, bi!
(Sumbong ug reklamo? Text sa 0910-8105522)