Paburot sa Summit

Kon makakita ka sa atong lokal nga mga opisyal sa Sugbo nga maglaway, nga manghod lay dyutay sa mga irong buang, ayg kahibung. Wa lang sila kapugong sa ilang kaugalingon nga nagtan-aw sa dakong puntil nga giandam alang sa ASEAN Summit karong Disyembre. Gawas sa naandan sa mga mayor nga pagkapon sa gahin alang sa pag-ayo ug pagpalapad sa kadalanan, ang ilang mga asawa naghinam-hinam sab nga makabahin sa dakong kuwarta alang sa pagkaon ug kalingawan sa mga delegado sa nagkalainlaing kanasuran.

Pananglitan, naglaraw sila pagtanyag sa lamian natong butong ngadto sa mga bisita. Duna lay gamay'ng problema. Gipresyohan nila ang butong og, panggunit mo sa inyong lingkoranan, tag-P500 matag usa! Naglaraw sab sila pagpasayaw sa mga tinun-an pagsugat sa mga delegado. Apan ang matag bata gigahinan nilag tag-P1,500 (ug kitang tanan nahibawo nga di kakita bisan anino na lang sa kuwarta ang maghago intawong mga bata).

Maayo na lang nga may ligdong pang tigpasiugda nga nibaraw sa ilang binuang. Ayaw hinuon pagdamgo nga dutlan sa kauwaw ang mga hingtungdan. Ang mosunod nga mga adlaw hangtod Disyembre makasaksi sa ilang mga paugat pagpaburot sa ilang mga bolsa ginamit ang summi

* * *

Pormal nga gilusad sa TV Patrol Central Visayas sa ABS-CBN Cebu karong adlawa ang sunud-sunod nga mga debate labot sa kontrobersiyal nga kampanya pag-usab sa batakang balaod. Tulo ka hugna sa lalis ang mahitabo karong semanaha: Ang una ipahigayon karong buntag atol sa Kulokabildo.Com sa Ayala Activity Center; ang ikaduha himuon atol sa Barangay Kapamilya karong Huwebes sa hapon; ug ang ikatulo, masaksihan karong Biyernes sa buntag atol sa Kapamilya Media Forum sa SM City Entertainment Plaza.

Nanghinaot mi nga ang mga debate nga salmotan sa mga representante sa nagkalainlaing sector sa katilingban makapatin-aw sa pipila ka makalibog nga mga aspeto sa Cha-Cha (charter change), sama sa mga pasangil nga gitumong ni (1) paglipat sa katawhan gikan sa lapad nga pagduda sa pagpanikas ni Pres. Arroyo sa eleksiyon sa 2004 ug (2) pagtino nga magpabilin ang presidente sa Malakanyang hangtod sa 2010 o lapas pa pinaagi sa pagkanselar sa eleksiyon sunod tuig.

* * *

Laing kalihokan sa tibuok buwan nga kasaulogan sa ika-11 nga sumad sa pagkatukod sa DYAB Abante Bisaya mao ang local job fair karong tibuok adlaw sa Hunyo 24 sa Abellana National School. Gipasiugdahan sa Cebu Chamber of Commerce and Industry pagtimaan sa Cebu Business Month, ang job fair gipaluyohan sa DMDP sa Dakbayan sa Sugbo, DOLE-7 ug DYAB.

Gipunsisokan sa gatosan ka aplikante ang pre-registration ug pre-screening dungan sa Halad sa Kapamilya sa Plaza Independencia niadtong Sabado. Kapin sa 50 ka employers ang nitanyag sa kaliboan ka kahigayonan sa panarbaho atol sa gipaabot nga labing dakong job fair sa Sugbo karong tuiga.

* * *

E-mail: [email protected]