KBP ug vigilantes

Ang Kapisanan ng mga Brodkaster ng Pilipinas (KBP) dinhi sa Sugbo mopasiugda og binuwan nga media forum nga mabati sa mga sibyaanan matag kataposang Sabado sa buwan. Ilusad ni sa Marco Polo Plaza Hotel sa Nivel Hills sa Dakbayan sa Sugbo karong Hunyo 24. Matud ni KBP Cebu Chairman Edward Abad makatampo ni sa pagpalig-on sa gawasnong pagpanibya ug lehitimong katungod sa pagpakisayod.

Ang mga tigpasiugda sa proyekto nga gipangulohan nilang Carlo Dugaduga sa MBC, Bong Aznar sa RPN 9 ug Jun Carillo sa Bantay Radyo nagkauyon nga tukion atol sa paglusad sa KBP forum ang vigilantism sa Sugbo. Suwayan nila pagdapit si Davao City Mayor Rodrigo Duterte, ang gipasanginlang amahan sa vigilantism sa Mindanao nga gikopya dinhi sa Sugbo ug sa ubang bahin sa nasud, ug ang lokal nga mga opisyal ug kahugpongan nga uyon ug supak sa laktod nga paghipos sa gidudahang mga kriminal.

* * *

Gatosan ka mga doktor, mga dentista, nurses ug ubang mga boluntaryo nagtambayayong paglusad sa Grand Halad sa Kapamilya sa Plaza Independencia sa Dakbayan sa Sugbo. Ang mga doktor gikan sa Cebu City Medical Center (CCMC), Cebu City Health Office, Talisay City District Hospital ug Philippine Air Force. Ang mga dentista gikan sa Cebu Dental Society, Mandaue Dental Society ug PAF. Samtang ang nurses gikan sa Philippine Paramedical and Technical School ug sa CCMC. Ang ubang mga boluntaryo gikan sa Association of Concerned Texters (ACT).

Gawas sa libreng konsultasyon ug mga tambal ug pagpangibot sa ngipon, duna say libreng pagpamakuna batok sa Hepatitis B sa mga bata ug mga dagko, blood sugar screening ug family planning seminar. Duna say libreng pagpamakuna, pagpamurga, mga bitamina ug shampoo sa mga iro ug mga iring. Masulub-on hinuon namong ipahibawo nga tungod sa kaapiki sa panahon way libreng pap smear ug chest x-ray examinations.

* * *

Malipayon hinuon ming mopahibawo nga dunay one-stop shop sa mahinungdanong mga pangalagad sa gobyerno sama sa paghikay sa mga aplikasyon sa pasaporte sa Department of Foreign Affairs, paghikay sa mga dokumento sa National Statistics Office, paghikay sa mga lisensiya sa mga drayber sa Land Transportation Office ug paghikay sa aplikasyon sa clearance sa National Bureau of Investigation.

Duna say libreng Internet connection sa Smart Bro, libreng tawag sa overseas Filipino workers sa Intouch Calling Club, libreng serbisyong legal sa mga abogado sa Integrated Bar of the Philippines, libreng lugaw gikan sa Bantay Bata 163 Cebu, libreng masahe ug reflexology, ug kon ang imong panginahanglan di na matabang sa mga puwersa sa yuta ug materyal nga mga donasyon, saw-on ka sa maymay, tambag ug hapuhap sa boluntaryong kaparian sa Artsidyosesis sa Sugbo nga gipangulohan ni Fr. Andie Mendoza sa Don Bosco.

* * *

Email: [email protected]