Cyber sex

Sa tanang labing bag-ong kahimanan sa instant messaging (IM) sa internet, ang Yahoo Messenger maoy labing mahigalaon. Nalupig niya ang MSN Messenger sa Microsoft, ang Google Talk, ang AOL Instant Messenger ug bisan ang labing uwahing bersiyon sa Skype. Gawas nga maoy gigamit sa mayoriya sa mga Sugboanon ug mga Pinoy, dunay duha ka alas nga wa sa uban:

• Makahimo ka pagpadangat og mensahe bisan offline ang imong contact (gisunod na ni rong bag-o sa MSN apan beta o eksperimento pa); ug

• Makahimo ka pag-record og duha ka gutlo nga mensahe kon di tubagon ang imong tawag o kon offline ang imong contact.

* * *

Ang ubang IM duna sab hinuoy ilang kaugalingong mga bentaha:

• Ang Skype maoy labing tin-aw og kalidad sa libreng voice calls kay ang mga tawag di moagi og central server, sa ato pa, di mabara kon mag-abot ang daghang tawag kay nagamit sa teknolohiyang P2P (peer-to-peer), o pagsaw-anay sa kapasidad sa nagkasumpay nga computers;

• Kon binayran nga voice calls ang hisgutan, ang intouch.com.ph (nga nia magbase sa Sugbo apan ang server tua sa Singapore) maoy labing barato, mas barato pa kay sa Yahoo, nga mas barato pa kay sa Skype (kinsa nitanyag hinuon og libreng tawag gikan sa PC ngadto sa landlines o cellphones apan alang lang sa US ug Canada);

• Ang Google Talk, sama sa ubang mugna sa Google, maoy labing yano ug labing gaan, way sagbot sa way gamit nga mga aspeto, apan sangkap sa labing mahinungdanong kahimanan; ug

• Ang MSN Messenger mahimong mataod sa PCs sa mga buhatan o mga korporasyon nga nagbutang og firewall pagpanalipod sa sensitibong mga dokumento ug ubang kasayuran sa ilang server.

* * *

Ang kasayon ning mga teknolohiya sa komunikasyon, inabagan sa barato kaayong webcams ug headsets, maoy nakahimong imposible sa kampanya batok sa nagkalainlaing dagway sa cyber sex. Way makapugong bisan unsay himuon sa mga suki sa internet cafes nga dunay pribadong mga lawak. Bisan ang babayeng mga kustomer sa bukas nga internet cafes di kapugngan nga mopakita sa dakong bahin sa ilang dughan ug ubang bahin sa ilang lawas nga wa na maato pagtabon sa nihit kaayo nilang mga sinina.

Ang pribadong mga bay, sama sa gironda sa kapolisan sa dakbayan sa Lapu-Lapu sa niaging semana, nagkinahanglan lang og PCs ug internet connection aron mahimong taytayan sa paghimamatay-gikan sa inosenteng pag-ila-ila ug paghigalaay, o sa pakitaay sa hubo nga lawas, ngadto sa pakighilawas pinaagi sa internet (virtual o cyber sex), binayran man o libre.

Gani, giladlad na sa mga tindahan ang bag-ong sex toys nga isul-ob sa mga magtungkawo sa software nga ma-download sa PCs; inig pislit niya sa usa ka bahin sa model mapislit sang bahin sa iyang lawas nga gisul-oban.

* * *

Email: leo_lastimosa@abs-cbn.com