VK sa Back Rubber

Hangtod karon nagpabilin nga dakong suliran ang video karera operations. Kini tungod kay lisod gayod sumpoon sa hingpit ang maong kalihokan. Kon adunay madakpan, mohilom lang og kadiyot. Unya kon sa ilang paniid dili na sila init ngadto sa kapolisan, mobalik na usab sila sa ilang operasyon.

Niadtong Abril 21, 2006 nakadawat kog text gikan sa magbabasa nga tag-iya sa cellphone number 0906-3712150. Gitaho niya kanako pinaagi sa text nga naay nag-operate nga video karera diha sa may Back Rubber. Sa akong pagsabot sa text sa atong texter, anaa usab siya magpuyo sa Back Rubber mao nga nasuheto siya sa maong dapit ug nakaila siya sa mga video karera operator diha.

Matud pa sa atong texter nga dugay na kaayo nga nag-operate ang video karera diha sa Back Rubber apan wala pa gayod kini madakpi. Ang mga ngalan sa nag-operate og video karera diha gihatag sa atong texter apan ang ila lang unang inisyal ang atong ibutyag kay wala pa man makompirmar kon tinuod ba ang gitaho niya kanako. Ang inisyal sa duha ka operator mao si D ug TK.

Maayo tingali nga himoan kinig pakisusi sa atong mga tinugyanan aron masuta kon unsa kini ka tinuod. Dili man god maayong pasagdan lang kining magpadayon. Malagmit walay nakataho sa mga awtoridad niining maong kalihokan diha sa Back Rubber maong wala kini madakop. Pero karon nga may nakahatag na kanatog impormasyon, angay kining susihon.

Sa laing bahin: "Sir. palihog kog lili anang dakop sa CITOM sa smoke belching. Wala gyoy makapasar kay gi-set daan sa 90 plus ang score unya 60- ra man ang passing. Bisan walay aso mahagbong gyod. Klarong panguwarta. Kaming mga drayber mosibat na lang." -- 0917-3941520

Morag maglisod ko sa pagtuo niini, da. Pero wala man usab tingaliy katarongan nga magtumo-tumo og estorya ang atong texter. Mao nga angay susihon kon unsa kini ka tinuod. Dili man usab makiangayon ngadto sa mga driver kon tinuod man ugaling kini. In fairness sab ngadto sa CITOM, bukas kining lindog alang sa ilang pagpasabot sa ilang habig.

* * *

(Sumbong ug reklamo? Text sa 0910-8105522)