Pasalamat alang sa Barangay Health Workers

Karong semanaha, adunay napasaka nga kaso sa piskaliya sa probinsya diin dako kaayog kalabutan ang mga Barangay Health Workers.

Usa ka apohan nga Barangay Health Worker sa Talisay City ang mipadakop ug misumpo sa dautan nga binuhatan sa usa ka babaye kinsa miilad sa iyang mga apo nga mga batan-on ug midala niini sa Mandaue ug sa Bacolod aron kini pasayawon ug hilas nga sayaw ngadto sa mga customer. Miagi og seminar ang maong apohan parte sa RA 9208 batok sa prostitusyon ug trafficking, busa dako kaayo kinig natabang kaniya ug naghatag kaniyag giya ug kaisog aron masumpo ang pagbiktima sa iyang mga apo.

Usa usab ka Barangay Health Worker sa Minglanilla ang mipadakop sa usa ka inahan nga nagpabaya sa iyang usa ka tuig pa lamang nga anak. Wala kini pakan-a sa maong inahan bisan pa nga gihatagan siya og kwarta sa iyang puyo-puyo alang sa panginahanglan sa ilang mga anak. Magsige kinig yampungad sa imnanan ug madyongan samtang ang iyang mga anak nga nagpangedaron og usa ka tuig ug tulo ka tuig adto magkamang kamang sa yuta nga pinasagdan ug walay nag-atiman. Ang Barangay Health Worker misumbong sa ilang kapitan sa barangay, kinsa mipatawag sa maong inahan ug mimaymay niini. Apan miagi ang pipila ka adlaw, balik sa bisyo na pud ang maong inahan. Usa ka batan-on ang nakasulod sa maong panimalay ug nakakita sa batang usa ka tuig pa lamang ang pangedaron nga pwerte nang luyaha. Gikugos niini ang bata ug gipatong sa lamesa sa madyongan, aron ipakita sa inahan nga kini nagkinahanglan sa daling tabang kay himatyonon na. Gilayon miaksyon ang Barangay Health Worker ug misumbong sa mga pulis aron madala ang bata sa hospital ug madakop ang inahan.

Dako kaayog natabang sa atong komunidad kining mga Barangay Health Workers. Daghan nga mga health workers mialagad nga libre aron pagtubag sa mga panginahanglan sa ilang katagibarangay. Pananglitan, adunay mga lugar nga ang madali-dali og sangpit kon dunay magbati o umalanak mao ang Barangay Health worker. Bisan kulang sila sa gamit apan nagpalabi ang ilang pagbati ug kamatinud-anon sa pagserbisyo sa komunidad. Andam usab sila pagtambong sa mga seminar ug training bisan walay suhol, aron lamang makakat-on sila og mga paagi nga mas ma-maayo ang ilang serbisyo.

Tungod niini, dako kaayo ang atong pasalamat nga anaa kining mga Barangay Health Workers. Alang kanako, sila ang bag-o natong hero sa atong komunidad. Susama sila sa mga bombero ug rescue workers didto sa New York nga maoy giilang hero ug sangpitunon sa mga nanginahanglan . Ang nakadiperensya lang kay kining atong mga barangay health workers mialagad nga libre ug walay pagpaabot nga sila ilhon sa ilang nabuhat. Nagpaila kini nga kon motabang diay ang mga tawo sa ilang komunidad, pwede diay kini nilang mapalambo. Ug busa angay lang usab sila nga atong suportahan. Sila naghatag og paglaum sa atong nasud.

Nagpasalamat usab kita sa mga opisina sa goberno ug sa mga NGO's nga maoy nagiya ug naghatag sa mga seminar ug bansay-bansay sa mga barangay health workers. Tingali moabot ang higayon nga mahatagan silag gagmay'ng himan ug bisan gamay lang panggasto-gasto o honorarium. Ato sab nga masugyot nga unta adunay mga institusyon, sama sa Philippine Charity Sweepstakes (PCSO) nga makahatag kanilag ginagmay'ng himan, sama sa First Aid Kits.

Alang sa inyong mga opinyon ug reaksyon, palihug e-mail sa [email protected] o text sa 0915-5536986. Daghang salamat.