Amerika nabalaka sa mga vigilante killing

Uyon si Mayor Tomas sa concern sa Amerika sa giingong mga vigilante killing dinhi sa dakbayan nga miabot na og 162 ang mga biktima.

Matud pa sa mayor nga basin og makatabang ang nag-inusarang superpower sa kalibotan sa maong problema dinhi. Matud niya, "I'd like them to meddle, maybe they can help us help. We really need help"

Sa sayo pa, si American vice consul Rochelle Wolf, kinsa mao ang political affairs officer sa embahada sa Amerika sa Manila, miduaw sa dakbayan aron pagsusi sa mga nahitabong vigilante killing sa dakbayan nga nagsugod hapit duha na ka tuig ang nakalabay.

Gani ang regional director sa Commission on Human Rights nga si Alejandro Alonso ug ang Cebu City president sa Integrated Bar of the Philippines nga si Alex Tolentino mikonpirma nga nakigkita sila ni Wolf aron hisgutan ang maong problema.

Sa usa ka interbiyu sa dyLA, gibutyag ni Tolentino nga nasakitan kuno ang ambassador sa Amerika sa nahitabo nga grabe'ng paglapas sa tawhanong katungod dinhi sa Pilipinas nga usa ka suod nga alalay sa Estados Unidos.

Si Wolf giingong nadismaya sa mga kaso sa pagpatay sa dakbayan nga wala gayud masulbad sa kapolisan ug sa lokal nga mga opisyal. Ang IBP gikatahong mihangyo na sa CHR nga isang-at sa United Nations ang isyu sa mga vigilante killing sa dakbayan.

Matud ni Osmeña nga ang concern sa Amerika mahitungod sa mga pagpamatay dinhi sa Sugbo usa ka indikasyon nga ang higanteng nasud moapil sa ipahigayong panagtigum sa mga sakop sa Association of Southeast Asian Nations dinhi sa Sugbo karong umaabot Disyembre.

Dako og pagtuo ang mayor nga ang partisipasyon sa Amerika sa ASEAN Summit magdala unya og dakong palas-anon sa dakbayan mahitungod sa pag-implementar niini sa seguridad atol sa maong panagtigum. Nakaagpas ang mayor nga dili basta-basta ang siguridad nga ipatuman kon moapil gayud ang Amerika sa labing dakong panagtigum sa mga miyembro sa ASEAN.

Ug kini mao siguro ang hinungdan nga concern ang Estados Unidos sa sitwasyon sa kalinaw ug kahusay sa dakbayan pinaagi sa kabalaka niini sa problema sa giingong mga vigilante killing nga wala gayud masulbad sa otoridad hangtud karon.

Ang giingong kaso sa mga vigilante killing miabot na ngadto sa 162 sukad pa sa Disyembre sa 2004 sa dihang usa ka ex-convict ang gibirahan sa nag-inusarang mamumuno nga nagsakay og motorsiklo didto sa barangay San Roque kaniadtong nakalabay'ng Martes.

Kahinumduman nga usa ka grupo sa mga American human rights lawyer ang miduaw sa kaulohan sa niaging semana aron pag-imbestigar usab sa pagpatay sa pipila ka mga sakop sa mga militanteng grupo ug sa pipila ka mga mamahayag sa nasud.

Ug nadagit usab sa atensiyon sa mga US human rights lawyer sa mga pagpamatay mugna sa giingong mga vigilante dinhi sa dakbayan. Gani, mianhi gayud ang maong grupo aron sa pagpakisayod sa maong problema nga ilang giingong usa ka dakong kalapasan sa tawhanong katungod.

Hinuon, kining maong kalamboan makatabang paghatag sa katawhang Pilipino og sosyal nga obligasyon alang sa kampanya batok sa naghitak nga pagyatak sa tawhanong katungod dinhi sa Pilipinas.