Tulis sa text

Sa kataposan, nakakita na gyod og mas paspas nga paagi ang National Telecommunications Commission (NTC) pag-atiman sa mga reklamo sa mga konsumidor nga gipabahaan og spam text messages sa ilang cellular phones. Di na maglisudlisod pang mga konsumidor pagtultol ug pagpanuktok sa buhatan sa NTC aron pagsumbong sa gidudahang kawat o tulis sa text. Ang ilang mga reklamo mahimo na lang, nakatag-an mo, i-text. Kon usa ka sa biktima, sayon rang imong buhaton: Sa kataposang bahin sa gidudahang spam text message, suwati og slash (/), dayon isuwat ang ngan o numero sa gigikanan sa mensahe ug ipada sa 682. Makadawat dayon kag automated nga tubag nga nakuha sa NTC ang imong text.

Kon mapamatud-an sa NTC nga spam ang text message, mandoan dayon nila ang nagpada nimo sa mensahe (mobile phone operator o laing kompaniya) nga ulian ka sa bayad sa mensahe. Ang NTC mo-text dayon nimo sa lakang nga ilang gihimo.

* * *

Apan ayaw una. Di pa ni maoy sistema karon. Plano pa lang ni nga kabahin sa bag-ong mga lagda sa unsolicited nga promo text messages nga ipagawas sa NTC dayong tapos ning buwana. Makigtagbo pa si NTC Chairman Ronald Solis sa mga komisyonado aron paghingpit sa mga lagda.

Sa ato pa, kon padayon kang nabiktima sa spam text messages, ang naandang hasol ug langay nga paagi pay imong madangpan. Kon tapolan ka, mopahit na lang intawon sa wait ug moluom sa tumang kapungot di lang sa kuwartang nausik kon dili sa daylang nga paugat sa higante-ug-naghitinghiting-sa-ginansiya nga mga kompaniya sa telepono.

Ubos sa gisugyot nga mas higpit nga mga lagda:
• Ang lisensiya sa mobile phone operators mahimong kanselahon kon makalapas sila; ug
• Ang content providers (ang mga kompaniya nga maoy nagpada sa text promos) kinahanglan sang magparehistro sa NTC.

* * *

Wa kong kahibawo kon may teknolohiya ug mga kawani bang NTC nga makapatuman sa ilang gisugyot nga mga lagda. Wa pa sab sila mosulti kon libre o may bayad ba ang pag-text sa mga konsumidor sa ilang buhatan (682). Igo lang nipasalig nga aksyonan dayon apan way gitakda pila ka adlaw una maatiman ang mga reklamo.

Nahadlok sab ko nga way igong kaisog ang nasudnong liderato sa NTC pagpatuman sa mas higpit nga mga lagda. Sama sa binuang nga ilang gihimo paglasaw sa ilang pagdeklarar sa VoIP (voice over internet protocol) nga value added service (wa na tuod magkinahanglan og prangkisa sa Kongreso apan pabundakon sang gagmayng mga negosyante og P50 milyones nga puhonan), nabalaka kong sukipan na sab nig probisyon mohatag sa gamhanang mobile phone operators sa way kinutobang lusot gikan sa hustisya nga gipangayo sa kabos ug gipahimuslan na pag-ayo nilang mga konsumidor.

* * *

Email:leo_lastimosa@abs-cbn.com