Pagtuo lang

Misakay si Mayor Tomas Osmeña sa pagduda sa Muslim community nga 'scripted' ang pagsulay og pagpamomba sa SM City Cebu sa mga grupo nga dili gustong anhi sa Sugbo ipahigayon ang umaabot ASEAN summit sa Disyembre.

Kun tuohan nato ang bersiyon sa Muslim community, maingon-ingon nga walay teroristang naglaroylaroy ang Sugbo.

Wala na ba diay kitay angayang kabalak-an?

Hinuon, pagduda lang na!

Pero ang nahibudngan ko lang ni Tomas nga dali kaayo siyang nagpadala sa maong pagduda nga sa akong tan-aw niya segurista man siyang dako.

Usa sa gikatiyabawan sa Muslim community mao ang pagtuong gi-salvage ang duha ka teroristang napatay sa mga polis sa dakbayan sa Sugbo human misukol sa dihang gisita.

Ang samad sa kamot sa duha gituohan sa Muslim community nga agi sa posas. Apan mitingog na ang medico-legal officer nga mihiling sa patay'ng lawas sa duha kinsa mipamatuod nga ang maong mga samad dili sa posas ug posibleng nakuha sa pag-alsa-alsa gikan sa ilang gitumbahang lugar.

Dili angayang moluwat og "premature" nga mga pagtuo si Tomas.

Angayang ipamatuod niya sa mga Sugboanon ang iyang pagka-bagsik, bisan sa mga pagtuo ug buhat.

* * *

MAKUHA. Unsa man ang makuha sa mga grupong dili mosugot nga anhi ipahigayon ang ASEAN summit kun bombahan ang usa ka department store?

Layo ra kaayo nang pagtuoha.

Una, desidedo na ang presidente nga anhi sa Sugbo himuon ang summit.

Ikaduha, nakahimo na kita og mga pagpangandam nga wala himoa sa ubang mga probinsiya sa nasud nga wala uyoning adto ipahigayon ang summit. Kun ibalhin sa laing probinsiya ang summit, mangandam na usab sila ug atrasawo na kaayo ang panahon tungod kay unom na lang ka bulan, Disyembre na.

Ikatulo, tanang plano alang sa maong dakong kalihukan sa Sugbo andam na ug nakagasto na ang mga nahingtungdang ahensiya alang sa maong katuyoan.

Busa, walay igong rason nga ang ubang probinsiya mosugo sa duha ka tawo nga nasakpang mibilin og bomba duol sa SM City Cebu aron ibalhin ang summit sa laing lugar.

* * *

TERORISMO. Mas katuohan pa hinuon ang impormasyon nga ania na dinhi sa Sugbo ang mga ilegal nga kahugpongan aron magsamoksamok sa umaabot ASEAN summit.

Walay sama nga insidente sa miaging panahon nga gitamnan og bomba ang usa ka department store.

Ang makahimo niana kadto lamang sakop sa mga grupong buot mopukaw sa nagkatulog ug hilom nga Sugbo, kun hisgutan nato ang kahusay ug kalinaw.

Dako ang pagtuo sa kadaghanan nga dugay nang mipuyo dinhi sa Sugbo ang mga terorista nga buot manglawgaw sa umaabot summit, aron lang makatagamtam ug maanad sa kasamtangang palibot sa Sugbo ug pag-ila sa mga lugar asa sila maka-eskapo engkaso og magka-letse-letse ilang operasyon.

* * *

RESPETO. Angayang respetohan ang mga lider sa Muslim community sa ilang pagtuo.

Sumala pa nila nga dili mga lunsay'ng Muslim ang duha nga mitanom og bomba sa SM City Cebu.

Mismo ang Office of Muslim Affairs mimatuod nga wala sila makaila sa duha. Akong nasabtan nga wala silay rekord sa OMA tungod kay dili sila mga Muslim, apan mga convert ngadto sa tinuohang Islam gikan sa pagka-Kristiyano.

Apan maayong masabtan sa kadaghanan nga ingon niini ang karakter sa sagad sa mga miyembro niining gitawag og Rajah Sulaiman Movement. Sagad sa mga miyembro sa maong grupo mga Kristiyano nga na-convert ngadto sa tinuohang Islam.

Sa akong nasayran, ang maong movement gihinganlan og Rajah Sulaiman tungod kay gi-idolo nila si Rajah Sulaiman nga usa ka tawong walay ginoo, apan siyay gitawag nga "great defender" sa Manila.

Apan maayong klaruhon nato nga walay labot ang mga Muslim niining Rajah Sulaiman Movement. Gani, gi-kondenar kini sa pipila ka hugpong ug relihiyosong pundok tungod sa ilang mga dautang binuhatan sa kauluhan.

Karong bag-o, usa ka balay sa Marikina nga gituohan sa mga awtoridad nga gilubloban sa mga sakop sa Rajah Sulaiman gironda ug nakuhaan og mga kagamitan sa pagpamomba.

Nagtuo ko nga dili motugot ang kaigsuonan natong mga Muslim nga magsabwag og terorismo ang maong mga tawo dinhi sa nasud.