Ang toll fee sa dalan Colon

Si Konsehal Coping Fernandez nagpalabang og resolution nga magwagtang sa mga dispatcher ilabi na sa may dalan Colon nga iyang gireklamo nga nakahasol na sa dagan sa trapiko ug gani iya pang gipasanginlan ang ubang dispatcher nga manglabni ug manulis sa mga pasahero.

Magpasalamat ko og dako ni Konsehal Coping Fernandez nga nakakita na gyod sa mga tulisan og driver sa dalan Colon nga dugay na nga naproblemahan sa mga taxi ug jeepney drivers. Hinuon ako natingala kon nganong karon pa makakita si Konsehal Fernandez ning problemaha.

Sigon sa akong naobserbahan diha sa may dalan Colon konsehal, kanang mga tawo nga adunay patik ug bagsik dili mga dispatcher kon dili mga tulisan. Ang dispatcher manawag og pasahero para pasakyon sa sakyanang de pasaheroan pero kining mga tawhana nga adunay mga patik ug mga bagsik moderetso lang og dool ngadto sa mga drivers dayon pangayo og kwarta nga morag nakatag-iya sa dalan Colon kay kutob sa sakyanang de pasaheroan nga moagi ilang kolektahan. Unsa man diay ning dalan Colon sa pagkakaron aduna nay toll fee?

Hain man diay ang atong mga police nga wa man gyod makasita ug makadakop ning mga tawo nga manghingi ngadto sa mga drivers gamit ang ilang patik ug kabagsik? Sa kadaghang sakyanan sa police nga moagi sa dalan Colon samtang anaa kining mga tawhana wa man gyoy usa nga mikanaug sa sakyanan aron sitahon kining kabuang sa mga tawo nga adunay patik ug bagsik? Unsa may buot ipasabot niini. Ang kalihukan ning mga tawhana adunay imprimatur kon pagtugot gikan sa atong kapulisan? Hinuon ang mga kalihukan nga susama niini di gyod magdugay kon walay pagtugot sa atong kapulisan, mao na nga ako nagduda nga adunay nakabahin sa atong kapulisan niining maong kalihukan diha sa dalan Colon.

Sakto si konsehal Coping Fernandez nga wagtangon kining mga tawhana, apan kinahanglan nga dili lang ang sa dalan Colon ang wagtangon kon dili iapil usab ang tanan dapit nga anaa kining mga tawhana. Ang presencia ning mga tawong adunay mga patik ug mga bagsik nga manghingi ngadto sa mga drivers, wa lang kini makabalda sa dagan sa trapiko kon dili nakahatag usab kini og kaulawan sa Sugbo ngadto sa atong mga dumudoong.

Ang Sugbo sa pagkakaron nagsugod na sa pagpaguwapa ug pagpaguwapo sa mga dapit nga posibleng maagian sa mga bisita natong dagkong lider gikan sa nagkalain-laing nasud sa Southeast Asia nga motambong sa Asian Summit karong umaabot Disyembre puhon. Pero mag-unsa man kining maong mga pagpaguwapo ug pagpaguwapa sa Sugbo kon ugaling maoy makita sa atong mga bisita ang tinulisay diha sa dalan Colon. Ma way bili ang tanan natong mga pagpangandam.