Sa Transfer Certificate of Title nga giisyu sa Land Registration Authority ngadto ni Roque Ting nagpakita nga ang maong yuta nga naapil sa SRP anaa mahimutang sa sitio Sawsawan, barangay San Roque, Talisay.
Buot ni Mayor Tomas Osmeña nga ang maong yuta nga gipanag-iya ni Ting ug sa iyang asawa nga si Fatima, paliton sa dakbayan og siyam ka milyon ka pesos.
Ang isyu niini mao nga bisan og mapalit pa sa dakbayan ang maong yuta, magpabilin kini nga sakop sa Talisay bisan og apil kini sa SRP. Ang karaang titulo sa maong yuta naisyu kaniadto pang 1911.
Wala hinuon mahibaw-i kon kinsa ang unang nanag-iya sa maong yuta ug kon nganong nahipunta kini sa magtiayong Ting.
Apan bisan og mapalit sa dakbayan ang maong yuta ni Ting, magpabilin gihapon kini nga sakop sa hurisdiksyon sa Talisay.
Karon, ang Mandaue City duna nay modern solid waste management system nga gigastohan og P130 milyones.
Aron sa pagsiguro nga matuman nila ang gilatid sa Ecological Solid Waste Management Act, nag-apod-apod kini og mga moderno nga basurahan sa 27 ka barangay sa syudad.
Matud sa akong higala nga walay laing dakbayan dinhi sa Sugbo nga nakaapod-apod og mga garbage bins sa tanang kabarangayan.
Nagpalit usab kini og mga compactor trucks nga mokuha sa basura gikan sa 8,000 ka basurahan nga gibutang sa kabarangayan.
Bitaw, ang tukma nga paghakut ug paghipos sa mga basura mosangpot g'yod og usa ka limpyo nga dapit.
Dinhi sa dakbayan sa Sugbo, kuwang pagpatuman sa balaod. Gipasagdan lang ang mga tagdumala sa mga tindahan nga molabay sa ilang basura gawas sa ilang balay-patigayon.
Ambot, diri sa dalan Manalili, duol ra man unta kini sa tindahan sa among barangay kapitan, wala man niya makit-i nga ang tagdumala sa mga tindahan magpataka lang og labay sa mga basura inigdayon nila og sira sa gabii.
Taud-taud na man god nga wala ko makabasa og kalamboan sa maong kaso. Karong bag-o si Wesy miawhag na sa korte nga resolbahon na ang gipasaka niyang kaso.
Nasayran hinoon nako nga ang kaso nga kaniadto didto madistino ni RTC judge Eric Menchavez nabalhin na sa laing korte ug wala pa makalihok kay bag-o pa ang maong huwes.
Angay bitaw nga tagdon dayon sa korte kining maong kaso kay luoy baya si Wesy nga gitaktak sa pagka presidente ug chief executive officer sa ilang korporasyon tungod lang kay nagpa-sex change.
Nahibaw-an nako nga dakung masakiton si Wesy pagka karon. Wala g'yod hinoon ko makaila aning Wesy apan maluoy kita sa iyang kahimtang nga nanginahanglan og hustisya sa iyang gidangatan.
Napanglantawan hinoon nako nga malukmay ra gihapon sa ngadto-ngadto ang iyang amahan nga si magpapatigayon Norberto Quisumbing ug dili na siya masuko nga gikiha siya sa iyang anak.