Sobre sa K of C

Niining tungora sa akong lindog, akong hatagan og luna kining usa ka text nga gipadala sa usa ka magbabasa. Importante kaayo kini aron maalerto ang katawhan. Bahin kini sa modus operandi diin gigamit ang ngalan sa Knights of Columbus.

* * *

Ang iyang text nagkanayon: "Mangingilad alert. Diri sa Tabunok Public Market, Talisay City naay magdala og sobre sa Knights of Columbus. Mangayo silag donation o hinabang sa mga tindahan. Klaro kaayo nga ilad ni kay nagkurogkurog ang kamot. Daot unya adik og postura, nag-t-shirt og black ug nagmaong pants, nagtsinelas. Unya magdali-dali og lakaw. Ilad gyod! Hatag lang ang tindahan kay hadlok nga NPA. Hatag og P10 sulod sa sobre. Sirit dayon ang lalaki." -- 0927-9937595

* * *

Daghang salamat sa imong text, higala. Ako nagtuo sab nga ilad gayod kini gumikan kay katahapan kaayo ang mga lihok. Tiaw ba nga magkurogkurog man ang kamot? Unya magdali-dali og sibat kon makadawat nag kuwartang donasyon. Sa barog ug bayhon sa tawo nga imong gihulagway nga maoy naghimo niini, dili katuohan nga sakop siya sa Knights of Columbus o K of C.

* * *

Si Samuel M. Gilig, Sr., sakop sa Council No. 7397 sa Knights of Columbus Remedios Parish Labangon chapter, miingon nga may gipahigayon silang solicitation og mga sponsors alang sa ilang kalihokan niadtong kuwaresma. Mao ra kadtoy iyang nasayran ug wala nay lain. Dili sab sobre ang ilang gigamit kondili solicitation letter. Wala siyay kasayoran bahin niining sobre sa K of C.

* * *

Ang ila pod nga solicitation letter gisulat sa letterhead sa K of C nga may logo sa walang kilid. Yellow ang papel nga gigamit ug may serial number sa tuong kilid. Pinirmahan ang solicitation letter sa tulo ka personahe nga sakop sa K of C, ang moderator, state deputy ug district deputy. Ang solicitation representative sakop sab sa K of C ug gisukip uban sa iyang pirma ang council ug district number niya. Busa kon dunay solicitation nga gipasangil sa K of C apan wala magsunod niining maong format, posibleng usa kana ka ilad ug walay labot ang K of C niana.

* * *

Mao nga pagbantay kamo. Kon may mosungko kaninyo ug mangayog donasyon nga magdala sa ngalan sa K of C, ayaw dayon mog tuo. Tawag kamo sa K of C sa telepono isip 261-3678 aron pagseguro nga dili kamo mailad.

(Sumbong ug reklamo? Text sa 0910-8105522)