Loot ang mastermind?

Tambag nako sa akong kahigalaan sa PNP Criminal Investigation and Detection Group nga maayong dili nila tagdon ang mga suwat nga kunohay naghatag kanila og kasayuran kon kinsa ang mastermind sa pagpatay ni Bantay Dagat project director Elpidio dela Victoria.

Husto ang panahom sa pipila ka abogado nga akong nahinabi kagahapon nga ang maong mga kunohay kasayuran nga gihatag aron pag-ila sa tinuoray'ng mastermind sa pagpatay ni Dela Victoria, gitumong lang aron paglubog sa tinuod isyu.

Ang suwat nga gipatoo nga gikan sa mga nagpakabana nga lumulopyo sa San Roque, Talisay mitumbok nga ang mastermind sa pagpapatay ni Dela Victoria mao sila si Koronel Vicente Loot ug asawa nga si Mayor Marilou Loot.

Sila si Atty. Sesinio Andales ug Fiskal Mary Ann Castro maoy mihatag kanako og ideya kon kinsa ang responsable sa paghimo-himo sa maong suwat.

Daw sa nakatoo ko sa ilang gibutyag. Dihang gikontak nako si Koronel Loot kagahapon, gitug-anan ko sa Koronel nga pipila ka semana ang nakalabay dunay tawo nga mihatag kaniya og inpormasyon sa matud pa tinuoray nga gunman.

Ang maong inpormasyon ug ang dukomento nga gihatag ngadto ni Loot, nalakip usab sa suwat nga gipatoo nga gikan sa mga nagpakabana nga lumulopyo sa San Roque, Talisay - ang pinuy-anan ni Dela Victoria.

Buyno, husto man usab nga angay'ng susihon ang mga inpormasyon, apan kon klaro na gani usab nga gitumong kini aron paglubog sa isyu, angay na kini nga isalikway ug yam-iran.

Wala ko magpasabot nga kombinsido na ko nga si SPO1 Marcial Ocampo mao na g'yod ang mipatay ni Dela Victoria. Gani kon dunay mangutana kanako kabahin sa isyu, tug-anan ra nako sila sa dagan sa kaso.

Dugay na kami nga kaila si Ocampo. Kon wala ko masayop, PO2 pa ang iyang ranggo dihang kami nagkaila. Dili siya maldito nga pagkatawo, hinayon nga manulti.

Kini maoy rason nga daw sa dili ko makatoo nga siya makahimo sa pagpatay sa among kauban sa buhat. Apan luyo sa akong pagtan-aw ni Ocampo nga hinayon manulti, kalma, - apan gitumbok man god siya sa labing minus upat ka saksi nga may kalambigitan g'yod sa krimen.

Mao nga nalipay ko nga kining maong kaso anaa madistino ni RTC Judge Ireneo Lee Gako Jr. kay aron mapanid-an nako kanunay ang dagan sa husay.

Amigo nako si Dela Victoria ug higala nako si Ocampo. Sa ato pa, makapaabot kamo og patas g'yod nga pag-cover nako niining maong kaso.

Hinoon, sukad ko madistino diha sa Palace of Justice kaniadtong Mayo 10, 2005, wala pa g'yoy bisan usa nga mireklamo nga gituis nako ang detalyi sa ilang kaso.

Bisan dili ko abogado apan nagpakatakus ko sa pagsabot sa mga termino-legal aron nga mas sayon nga masabtan sa mga tigpaminaw sa radyo ug sa magbabasa sa mantalaan ang mga kalamboan sa kaso.

Alang ni Koronel Loot, akong tambag, ayaw tagda ang pasangil batok kanimo kay bisan ang mga abogado nga akong kaila, igo lang mihulagway nga gigamit ra ang inyong ngalan aron paglubog sa isyu.

Kon kinsa ang naghimo niini, dili na lang nato ibutyag, apan awhagon nato nga dili nila angay'ng buhaton ang maong paagi.

* * *

Pangumustahon diay nako ang mga imbistigador sa Ombudsman - si Engineer ug umaabot nga abogado Roderick Blazo ingon man sa acting Deputy Ombudsman Virginia Palanca-Santiago - kon unsa nay kalamboan sa pag-imbistigar nila sa anomaliya sa Lorega-San Miguel.

Duna man go'y nagtoo nga nataligam-an na lang nila ang maong isyu.