Buang ray dili mailad

Mga suki, taudtaod na karon nga wala kita maghisgot bahin sa modus operandi sa Budol-Budol Gang. Pahinumdoman ko lang kamo nga sa dili damhong higayon kalit lang usab nga mopasalir sa ilang tinonto kining mga tawhana. Mao nga angay gayod kamong magbantay kanunay. Mait-on ra ba kining maong mga mangingilad.

Ang labing kumon nilang estilo sa modus mao ang pagpakita og bag nga puno sa kuwarta ngadto sa ilang biktimahon. Sa kadugayan, moesplikar na sila nga mohulam og kuwarta ngadto sa ilang biktimahon. Kuwartahan unya manghulam? Makalibog! Makapatingala! Pero daghan gyod ang nailad niini.

* * *

Gani, may usa man ako ka texter nga wala makapugong sa pagkomentaryo sa pag-ingon: "Kana bang mangilad nga daghan og kuwarta. Bugo ra sad kaayo ang tawo nga ilang mailad kay naa ba goy daghan og kuwarta nga manghuwam? Hunahunaon sad unta sa gibiktima nga kon dili pa ilad nganong manghuwam pa man sila og kuwarta nga puno man kaha sa kuwarta ang ilang bag nga gidala." -- 0926-7692564

* * *

May punto ang maong texter. Husto siya. Pero sayon rang isulti kon kita wala sa sitwasyon. Dili kapanansagan ang pangilad. Lipat-lipat god kini. Bisan gani ang labing maalamon nga tawo bulnerable man gihapon nga mabiktima sa ilad. Kon kita nay anaa sa sitwasyon, tingali dili pod kita makamatngon pagdali nga nameligro na diay kita sa pangilad. Mao nga ang bugtong hinagiban batok niini mao ang pagbantay, pagmatngon ug pag-amping.

* * *

Gatosan na ka tuig ang nakalabay, usa ka bantogang magsusulat miingon: "There are some frauds so well conducted, that it would be stupidity not to be deceived by them."

Kon tinambanon nato sa pagbalit-ad ang lohika niining maong pamahayag, nagpasabot kini nga ang buang ray dili mailad. Clever ang mga mangingilad, malimbongon ug malalangon. Mao nga dili kita makaseguro kon dili ba kita mailad sa higayon nga kitay makasugat sa mga mangingilad, ilabi na ang mat-an kaayong mga sakop sa nabantog nga Budol-budol Gang.

Pero kon kanunay kang nagbasa niining lindog, hayan dali ka rang makabantay sa modus operandi sa Budol-budol Gang.

(Sumbong ug reklamo? Text sa 0910-8105522)