Mangunguot sa kan-anan

Dili na bag-o kining maong estorya. Malagmit nakadungog na kamo niini kaniadto apan posibleng wala lang ninyo kini hatagig gibug-aton. Mao kini ang hinungdan nga ako kining gisulat aron magsilbing pahimatngon kay kini posibleng mahitabo kaninyo ug kanako kay wala man ing gipili ang mga badlongon sa katilingban.

Kining maong estilo sa modus operandi anha ipasalir sa mga badlongon sa katilingban sa mga restaurant nga self-service. Kana bang ikaw mismo ang mangunay sa pagkuha sa imong orderon nga pagkaon. Mao na man kini ang uso karon, dili ba?

Gipahimuslan sab kini sa mga badlongon. Niining maong sistema, nakakita pod silag okasyon sa pagpasalir sa ilang modus operandi. Ang estilo mao nga samtang magpunsisok ang mga tawo sa pag-order og pagkaon, mohugop usab didto ang suspek. Pananglit naglinya ang mga kustomer, moapil pod siya sa linya ug magpakaaron-ingnon pod nga kustomer. Pero naniid lang diay siya sa mga tawo sa iyang palibot kon kinsay puyde niyang biktimahon.

Kon makapili na siyag biktimahon, maghulat na lang siya sa tukmang tayming. Unya sa dihang busy na ang prospective victim sa pag-order sa iyang pagkaon, anha na mosugod ang suspek sa pagpasalir sa iyang tinonto. Sa labing pino nga paagi, ablihan niya ang bag o kuoton ang bolsa sa biktimahonon aron pagkuha sa tanang kuwarta ug valuables sa sulod niini. Ulahi nang makamatikod ang biktima nga nawagtang na ang iyang salapi ug mahalong mga butang.

May mga higayon nga magbinugtong ra ang suspek sa paghimo niini. Apan kasagaran, may kuyog siyang back-up. Sa ingon, dili daling madiparahan ang ilang modus. Daghan na ang nabiktima niini. Iatol gayod sa mga suspek ang pagpahigayon sa ilang modus kon mag-order nag pagkaon ang ilang biktimahonon. Usa sa nabiktima niining maong tinonto mao ang asawa sa atong texter nga tag-iya sa cellphone no. 0916-2657719. Nadala gyod sa mga kiriwan ang bracelet nga mahalon sa iyang asawa.

Mao nga kinahanglang magbantay kamo ilabi na kon maoy inyong sudlon ang mga kan-anan nga daghan kaayog kustomer. Mao kini ang mga kan-anan nga paboritong dansohanan sa mga mangunguot nga magpakaaron-ingnon pod nga kustomer. Basin kon kanang imong gisundan o nagsunod nimo sa pila mao na ang mangunguot!

* * *

Sumbong ug reklamo? Text sa 0910-8105522)