Estudyante ang paborito

Mga suki, daghan karong mga badlongon sa katilingban nga ang mga estudyante maoy paboritong biktimahon. Usa na niini ang mga mangunguot. Nasayod man god sila nga may makuha gayod sila gikan sa mga estudyante sama sa kuwarta, alahas ug cellphone. Mao nga angay magbantay kanunay ang mga estudyante.

* * *

Usa ka magbabasa niining lindog nga tag-iya sa cellphone number 0918-6201481 mitaho nga adunay mga mangunguot nga mosakay og PUJ nga magbiyahean sa rotang Talamban nga mga estudyante pod ang paboritong biktimahon. Matud pa sa iyang taho, dapit sa Sunny Hills mosakay ang mga suspek.

Kasagaran tulo ka buok ang mga suspek. Mao ray ilang bantayan ang mga estudyante nga mokanaog sa jeep. Kadaghanan gyod sa ilang biktimahon mao ang mga estudyante. Angay bantayan kining mga tawhana.

"Mobiktima sila sa pasahero nga padulong mokanaog kay ila kining sundan," nagkanayon ang atong texter. "Maglagot ra ba ko. Mga estudyante ang ilang biktimahon."

Mao nga alang sa mga estudyante ug sa bisan dili estudyante nga mosakay og PUJ nga magrota og Talamban, pagbantay kamo niining tulo ka mangunguot nga gihisgotan sa atong texter. Kon may tulo ka tawo nga mosakay dihang dapita sa may Sunny Hills, panid-i sa hilom ang ilang mga lihok kay basin mao na kana sila ang giingon sa atong texter nga mangunguot.

* * *

Sa laing bahin: "Good day. Naa na diay JS Prom ang elementary karon? Imbes hapit na ang vacation, nag-amot-amot na sad ang elementary diri sa amo." – 0906-9679593 (March 23, 2006--09:49:36)

Dili kaayo ko suheto bahin niini. Pero nagtuo ko nga walay JS Prom sa elementarya. Kay sa akong kasinatian, ang hayiskol ra man ang may JS Prom. Hinuon, nunot sa pag-usab-usab sa sistema, basin may JS Prom na karon sa elementarya. Pero wala pa man koy nadungog nga balita nga may JS Prom gayod sa elementarya.

Kon matinuod nga walay JS Prom sa elementarya, klarong dakong tinonto ang nahitabo sa eskuylahan diha sa inyong dapit. Wala ra ba magdasig ang DepEd og dinagkong amotan karong panahona. Beripikahon unya nato kana.

Sumbong ug reklamo? Text sa 0910-8105522)