Pailob ni Jojo

Si Jojo de la Victoria daghang kawo. Gawas sa iyang pagka project director sa Cebu City Bantay Dagat Commission siya pa gyoy market administrator. Nisuway sab siya niadto pag-apil sa politika sa Talisay City. Hangtod sa iyang kamatayon, dako siyang opisyal sa parokya ni San Jose sa Tabunok. Sa iyang kabatan-on nahimo pa ganing commandant sa ROTC sa University of the Visayas sa mga Gullas sa habagatang lungsod sa Minglanilla.

Apan ang tinuod nga gipitik sa iyang kasingkasing, sunod sa iyang asawang si Evelyn ug anak nga si Vincent, mao ang iyang pagka magsisibya. Bisan naghupot nag tag-as nga katungdanan sa dakbayan sa Sugbo, wa niya hingpit talikdi ang radyo. Dayon niyang kamatay, siyay tagduma sa live coverage sa mga misa sa Tabunok ug Poblacion, Talisay di lang sa usa kon dili sa duha ka estasyon sa radyo.

* * *

Si Jojo di mahadlukon sa kamera ug sa mikropono. Sa dagkong mga operasyon nga iyang giapilan pagsakmit sa pinabuthang mga isda ug blasting caps, kanunay niyang gitawgan ang media. Bisan ang kausaban nga iyang gipasiugdahan sa mga merkado sa dakbayan sa Sugbo nahibaw-an sa mga Sugbuanon tungod sa iyang kasuod sa media.

Si Jojo maoy opisyal sa gobyerno nga ampay sa mga sakop sa media. Gawas nga mahimong tawgon bisan unsang orasa, tinuod gyong nagtuman sa iyang mga gimbuhaton ug nagtinguha pagpahibawo sa katawhan ug pagpasabot nila sa kahulogan sa iyang mga nahimo ug wa mahimo. Sa laktod, kanunay siyang dunay balita kay kanunay'ng dunay gihimo.

* * *

Maong gawas nga nakugang ko sa pagpusil niya niadtong Miyerkules sa hapon, nahugno ko pagkahibawo nga namatay siya pagka Huwebes sa buntag. Di lang tungod kay kaila mi kon dili tungod sab kay ang kasagaran sa media organizations namahuway alang sa Semana Santa. Maong ang labing suod niyang mga higala nagpaabot og tulo ngadto sa upat ka adlaw una nakasuwat o nakasibya mahitungod sa iyang kamatayon.

Akong nahibaw-an nga bisan ang iyang patay'ng lawas gipapaabot sa pagbalik sa medico legal officer nga nagbakasyon sa Ormoc City sa Leyte una na-autopsy. Nahadlok kong bisan ang iyang haya ug lubong maapektahan kay iyang mga paryente ug mga higala nahinayak na sa ilang mga lakaw. Nakaseguro hinuon kong nakasabot siya.

* * *

Kay si Jojo sa buhi pa mapailubon. Ma-radyo, ma-politika o ma-simbahan man, di siya madali-dalion. Dihay higayon nga giinitan siya sa mga batabata ni Cebu City Mayor Tomas Osmeña, ang iyang pailob maoy nakapalingkawas niya.

Kataposan ming nagkita si Jojo sa Kapamilya Media Forum sa SM City pagsulbong sa cha-cha. Nakugang ko kay gisaway niya si Pres. Arroyo. Dihang ako siyang gipangutana di ba siya initan sa City Hall, nitubag nga igo lang siyang nagpadayag sa baruganan sa kaparian. Bisan ang iyang pailob wa kapitol sa iyang kaisog pagbarug alang sa iyang mga gitoohan. Email: leo_lastimosa@abs-cbn.com