Taphaw nga pagtuo

Sumaa pa, niadtong adlaw nga giingon nga tukbon sa tubig ang Talisay, namingaw kono ang kabaybayonan sa Talisay, ug kadtong nangisog pagpaninda, waa kahalini.

Dihay nangutana kon nganong Talisay ra man? Ang SRP diay, nganong waa may labut sa inundation? Ngano kono nga ang kang EddieGul ra man nga Talisay ang lunopan ug di iapil ang kang Tomas nga SRP. Duna diay pilion ug pinalabi ang katalagman?

Anyway, pasalamat kita nga wa mahitabo ang gikahadlokan.

Apan, naghulagway lamang kini sa ka-taphaw sa atong Faith. Dali ra kaayo tang patuhoon. Hinumdom mo sa 3 days of darkness? Ambut pila na ka 3 days of darkness ang gitagna-tagna.

Dihay 3 days of darkness nga didto ko adto sa Butuan. Sa nagpadong pa sa maong mga adlaw, puno-puno ang simbahan. Kuyawan ko adto tungod kay sa maong adlaw, medyo midugdog ug mikilat pod. I thought mao na to. Kuyawan ko kay waa ra ba ko ka-kompisal.

Unya, dihay laing three days of darkness. Bag-o-bag-o pa to. Nikusog ang halin sa kandela tungod kay paandamon kono tag kandela. Kandela ra kono nga di mapawong. Ang uban, na-siring-siring og pangita kon asa mapalit ang maong matang sa kandela.

Tapus sa katalagman sa Ormoc, dihay mga warning nga pahadlokon kono ta sa Ginoo. Hangtud nga dihay nibawos pag-ingon nga pahadlokon kita sa asawa ug panggaon ang kabit.

Anyway, ingon niini ka taphaw ang atong Pagtoo. Dali ra kaayong matarantar.Lagmit dagku sad tingali tag mga kasal-anan. Lagmit sige lang gihapon tag lie, cheat & steal.

Ang katalagman sa modangat sa kalibutan, anaa kini sa Bibliya, ug waay nasayod kon kanus-a ni mohapak nato. Mao nga maayong andam ta kada-adlaw. Kay duna may individual ug personal nga mga katalagman nga modangat kanato kada-adlaw. Karon: andam ka na ba?