Haum ba ang cha-cha?

Mitumaw na usab ang isyu sa pag-usab sa sistema sa atong gobiyerno taliwala niining subsob karon nga kampanya sa Charter change. Kugi karon ang kampanya sa ubang mayores sa nagkadaiyang lugar sa nasud pagpapirma sa ilang mga konstituwente pagsuporta sa Cha-cha.

Apan daghan ang mialkontra niining maong kampanya, ilabina kadtong taga-oposisyon. Gani didto sa San Juan, Metro Manila, ang balwarte ni kanhi presidente Joseph Estrada, subsob usab ang kampanya batok Cha-cha nga ilang giingong gitumong sa administrasyon aron pagpadayon pagkapyot sa Presidente sa gahum.

Niining kampanya alang sa Cha-cha, mitumaw ang usa ka dakong pangutana alang sa matag usa kanato: angayan ba g'yud nga ilisdan ang sistema sa atong panggobiyerno taliwala ning mga krisis sa ekonomiya ug politika karong panahona?

Matud sa mga nagpaluyo sa maong kampanya nga panahon na nga bag-ohon ang sistema sa atong pangagamhanan gumikan sa grabeng pamolitika nga nagpahinay sa dagan sa kalamboan sa nasud. Ilang gigarantiya nga kon mausab na ang sistema sa atong pangagamhanan, makatagamtam kita og dili tiaw nga kalamboan tungod kay daghan na unyang puhonan ang mosulod sa nasud.

Apan unsa may ilang kasigurohan nga mouswag ang atong nasud kon usbon ang sistema sa atong pangagamhanan? O dili ba gigamit lang hinuon kining Cha-cha alang sa politikanhong interes sa uban?

Sa akong pangagpas, walay kaayohan ang gitagana niining Cha-cha. Hinuon, nagmugna kini'g kabalaka sa uban nga mosamot unya ang politikanhong krisis sa nasud gumikan sa pagkabahinbahin sa katawhan mugna sa kasamtangang problema.

Usa pa, mayoridad sa mga Pilipino ang wala makasabot kon unsa kining Cha-cha ug kon unsa ang tumong niini alang sa nasud. Kini maoy dakong problema nga angay sagubangon sa mga nagpaluyo niini tungod kay kulang sila sa krusada pagsabwag sa impormasyon mahitungod sa maayong tumong sa maong kampanya.

Apan nganong nagkinahanglan pa man kita og bag-ong sistema sa panggobiyerno hulip niining atong gisagop sukad na sa dugay'ng panahon? Nagpasabot ba nga kining atong kasamtangang klase sa pangagamhanan dili haum alang kanatong mga Pilipino?

Hinuon makapangutana kita ngano nga nakasugakod man ang nasud pagsagop niining kasamtangan sistema sa pangagamhanan kon dili kini haum alang sa katawhang Pilipino? Unsa may atong palabihon, ang magbag-o og putahi nga wala pa nato mahibaw-i ang lami ug epekto sa atong panglawas o ang mokaon sa naandang putahi nga dugay nang haom sa atong ginhawaan?

Wala kinahanglana ang pagbag-o sa sistema sa atong panggobiyerno aron kita makabaton og tinud-anay nga kalamboan kondili ang klase sa politika nga gisagop sa atong mga lider.

Kini gumikan kay klaro kaayo nga ang grabe nilang pamolitika mao hinuoy nagtukmod sa katawhang Pilipinhon pag-ambak ngadto sa bung-aw sa pagkaalaot.

Hangtod nga dili mohunong ang atong mga lider sa ilang puro pamolitika gumikan sa ilang kahakog pagkab-ot sa ilang personal nga interes, wala g'yuy kalamboan nga mosakdap sa nasud.

Bisan kon unsa pa nga klase sa panggobiyerno ang atong sagopon ug kon pabilin ang atong mga politiko pagtan-aw sa ilang personal lamang nga kaayohan, di gayud kita mahaw-as gikan sa lapok sa pagkainutil.