Bakak ni Secretary Peter Favila

Si DTI Secretary Peter Favila sa usa ka round table discussion miingon nga daghang trabaho dinhi sa Pilipinas, ang nakaapan lang kay ang mga tawo pilian og trabaho ug gusto nga mahimo dayong bise presidente o presidente sa kompanya.

Dugang pa ni Favila nga ang unemployment nga problema dinhi sa nasud naggumikan sa pagka kuwang sa kadasig sa pagtrabaho ug dili sa pagka kuwang sa trabaho.

Kamo, motoo mo ni secretary Favila? Pilian ka og trabaho? Mamili ka og trabaho? Gusto ka dayon nga mahimong bise president o presidente sa kompanya nga imo gusto nga trabahoan?

Wa kaha mapakong sa punoan sa sili ang ulo ni secretary Peter Favila, mao nga ang utok morag nasilian? Nagpasagad na lang sa iyang pamahayag?

Di na ta kinahanglan pa nga moyagyag og numero aron atong kapamatud-an ang pagka dakong bakak sa pamahayag ni secretary Favila. Hinoon pangutan-on ta siya kon nasayod ba siya pila ka mga lisinsiyado nga magtutudlo ang nagtindera. Pila ka mga professional ang nagtrabaho sa mga trabaho nga dili nila linya.

Matud pa sa Labor Education and Research Network 10.8 ka milyon sa 36 milyones ka mga Pinoy ang way mga trabaho ug kun nagtrabaho man gagmay og suweldo o nagtrabaho sa mga trabaho nga dili linya sa ilang kahibawo.

Dinhi sa Pilipinas ang pagtoon ug pagtapos sa kolehiyo mao ang pinakabahandi nga gustong ihatag sa mga ginikanan ngadto sa ilang mga anak aron dili kini magkalisod sa pagpakabuhi ning madaug-daugon nga katilingban. Ang mga tinun-an mikuha sa kurso nga sa ilang huna-huna makahatag kanila og harohay nga pagka butang. Pero pagkahuman pagtoon sa kolehiyo asa sila paingon, nakatrabaho ba silang tanan? Asa man ang giingon ni secretary Favila nga daghang trabaho? Sa milabay nga buwan sa Marso pila ka libo ang nakahuman sa ilang pagtoon sa kolehiyo, makatrabaho kaha silang tanan? Kon makatrabaho silang tanan dinhi motoo na ko nga daghan nang trabaho sa Pilipinas.

Ang mga aplikante mamili og trabaho. Tinood na? Ibutang ta nga tinood ang sulti sa halangdon natong sekretaryo, pero dili ba usab makatarunganon nga mamili kita sa trabaho nga nahasubay sa atong kurso nga nahuman? Kon pananglitan imong nahuman ang kursong abogasya, makatarunganon ba nga patrabahoon ka ni secretary Peter Favila sa pagka laborer sa usa ka construction company kay way bakante sa legal office niini? Kon nahuman nimo ang kursong nursing (diin mahal kaayo ang matrikula ug grabe ka gasto kining maong kurso) ug usa ka na ka registered nurse, makatarunganon ba nga patrabahoon ka ni secretary Favila sa pagka sales clerk? Ug kay dili ka motrabaho sa pagka laborer o pagka sales clerk ingnon ka na nga mamili og trabaho? Kon maohon kana, may pa wa na lang ta motungha ug nagbaol na lamang kita. Kuhaan na ba lang gyod kita ning gobernoha sa atong katungod pagpili sa trabaho nga nahaum sa atong qualifications?

Ikaw secretary Peter Favila, wa ka mamili og trabaho nga nihaum sa imong qualifications kaniadto? AMBUGERO!

* * *

Kay ingon man si secretary Peter Favila nga adunay daghang trabaho dinhi sa Pilipinas pero mamili lamang kuno kamo, kamong way mga trabaho akong gitawagan ug gipahibalo: Adto kamo sa opisina sa DTI ug pangitaa si secretary Favila unya pangutana kon asa kanang trabaho nga iyang giingon kay inyong sudlan ug nga dili kamo mamili og trabaho.