Sugarol nga nasud

Ang Small Town Lottery gipasiugdahan sa kagamhanang Arroyo aron alkontrahon ang sugal nga jueteng.Kini human ang opisina ni Hagedorn nga gitahasan sa pagsumpo sa sugal nga jueteng mirekomendar sa maong operasyon. Tungod niini bisan og wa pay klaro nga patakaran gisugdan dayon ang pagpasiugda sa nahisgutang sugal.

Ang pagpadagan sa Small Town Lottery nagpakita lamang nga ang atong gobiyerno sugarol. Kini ang hinungdan kon nganong dili gayod mahatagan og kasulbaran ang suliran sa sugal nga mga gipasiugdahan. Dili ba ugod masulbad ang jueteng kon dili alkontrahan og laing matang sa sugal?

Ang Small Town Lottery usa ka sugal bisan man tood og gipadagan kini sa PCSO kana gumikan kay ang katuyoan niini mao man ang pag-alkontra sa sugal nga jueteng, dili sama sa lotto ug sweepstakes nga CHARITY ang katuyoan.

Apan bisan pa man, ang sugal legal man o illegal sa gihapon kini immoral busa angayan lamang nga pakigbatokan. Dili tanang legal moral.

Ang sugal angayan nga sumpoon dili kay palamboon. Ang sugal adunay kasulbaran kana kon wa na sa huna-huna sa atong kagamhanan ang pagkasugarol. Wa ta gipakatawong sugarol. Ang pipila kanato nahimo lamang sugarol tungod sa sugarol nga katilingban og sociedad. Way tawo nga nagtangag nang daan og pechas o ba kaha baraha sa dihang gipakatawo siya ning kalibutana.

Ang sugal mahatagan og kasulbaran kon mahatagan lamang kita og igong kapanginabuhian. Ang rason kon nganong ang mga tawo didto sa Central Luzon dili gayod mobiya sa sugal nga jueteng ug ubang matang sa sugal kana gumikan kay mao ra kini ang ilang kapanginabuhian. Busa kon aduna silay kakuhaan og kapanginabuhian mahilayo sila niini.

Ang sulbad sa jueteng ug ubang matang sa sugal matubag ug masulbad kon matubag na usab ug masulbad ang suliran sa kawad-on dinhi sa nasud.

* * *

Naklaro na gyod nga ang gipahigayong Barangay Assembly lukop nasud usa ka paagi sa paghipos og pirma sa katawhan aron maoy gamiton nga kamatuoran nga ang katawhan gusto nga usbon ang atong batakang balaod pinaagi sa Peoples Initiative. Ang nakaparat lang kay daghan sa mga mi pirma ang wa mapasabot sa ilang gipirmahan. Ang uban pa gyod kanila gihaylo og kwarta.

Didto lang sa siyudad sa San Juan, ang mga molupyo mitug-an nga gitanyagan sila og tag usa ka gatos ka pesos bugti sa gipapirmahan nila. Didto sa Manila segun sa taho nga atong nabati, nagpa-contest pa si Mayor Lito Atienza pinaagi sa paghatag og usa ka gatos kalibo ka pesos alang niadtong makakuha og pinakadaghang pirma sa ilang mga molupyo.

Dinhi sa Sugbo si kapitan Rupinta sa Barangay Ermita mibulgar nga gihanyagan siya og biente mil ka pesos alang sa pagkuha og pirma sa iyang mga molupyo. Ang mga molupyo gigahinan usab og tag dosientos ka pesos. Sa Bohol usa ka kapitan ang mipapirma sa iyang mga molupyo kay matud pa aron makakwarta. Pastilan!