Now na!

May sukaranan si Pres. Arroyo nga mahadlok sa iyang kaugalingong anino. Kay di na siyang kaseguro kon iya pa bang anino o kang Dinky Soliman na. Angay hinuong tambagan ang presidente nga di siya angayng magsige og lingi sa iyang anino. Kay si Dinky maoy labing dakog katawa kon simbako mapandol siya.

Gawas pa, kon maglingi-lingi sa iyang anino, mas maglisod siya pagtuman sa iyang awhag nga papahuwayon nang Hello Garci scandal kay siyay mangu sa katawhan pag-irog paingon sa unahan. Inay padayong manggukod sa iyang politikanhong mga kaatbang, nga inanay nang nakakuha sa pagpaluyo sa kinabag-an, ang presidente bisan sa sibaw nga mga pasangil sa pagpanikas, pagpamakak ug pagpangawat angayng magsugod na pagmatuod nga siyay labing maayong pangu ug paglaom sa nasud. Now Na.

* * *

Gipanghimakak sa Malakanyang nga ang pagsul-ob og itom nga t-shirts maoy hinungdan nga gidakop silang Dinky ug Enteng Romano kon dili ang ilang plano sa pagtapok batok sa presidente. Daghan hinuong nagduda nga gisakitan pag-ayo ang presidente sa mensahe sa itom nga t-shirts: "Patalsikin Na! Now Na!."

Ug sa di pa ka motoo sa pasangil sa oposisyon nga ang mga kaatbang lang sa presidente ang giistrikto sa kapolisan sa ban batok sa mga protesta, pahibaw-on ka nako nga mahimong dakpon lang gihapon silang Dinky ug Enteng bisan kon ang gimarkahan pang ilang t-shirts og "GMA Loves" o "GMA Cares."

Kay gawas nga 11% ra sa mga Pinoy ang motoo, ang 65% nga segun sa Pulse Asia uyon nga palagputon ang presidente pinaagi sa kudeta o resignasyon peligrong moulbo sa kasuko. Sa ato pa, bisan ang mensahe sa pagdayeg, sama sa "Patalsikin Na!," balidong sukaranan sa kasong inciting to sedition.

* * *

Ang mga mensahe sa t-shirts pabor man o supak ni Pres. Arroyo, sama sa pagpasaka sa impeachment complaints sa Kongreso, protesta sa kadalanan, mga resignasyon sa gabinete ug pag-alburuto sa kasundalohan, hinungaw lang sa gamot nga mga hinungdan sa nagkalapad nga pagduda sa kaligdong sa nasudnong liderato.

Di kaha maayo nga sa kataposan, human sa way kinutoban nga paghikuhiko ug lipatlipat, tubagon na gyod ni Pres. Arroyo ang mga pasangil nga, inabagan ni kanhi Comelec commissioner Virgilio Garcillano ug ginamit ang militar, kapolisan ug nagkalainlaing mga ahensiya sa gobyerno, gitikas niya ang eleksiyon sa 2004? Now Na!

* * *

Ug di kaha mas maayo nga inay gamiton ang kinatibuk-ang makinarya sa gobyerno pagtabon sa tinuod nga mga panghitabo, paghudlat sa mga saksi nga makapalig-on sa mga pasangil sa pagpanikas, pagpamakak ug pagpangawat ug paghaylo sa politikanhong mga alyado, kasundalohan, kapolisan, kaparian ug sipsip nga mga sakop sa media, di kaha maayong isakripisyo nang kahakog alang sa kaayuhan sa kinabag-an?

Now Na!