Krisis sa ABC

Sa sinugdanan, usa ra ka opisyal sa board of directors sa Cebu City Association of Barangay Councils ang uyon nga bayran sa iyang mga benepisyo ang kanhi project engineer sa ABC nga si Leah Rondez. Ang mayoriya sa mga sakop sa board nibasura sa demanda ni Rondez human siya taktaka sa pag-asumir sa bag-ong liderato sa ABC niadtong 2002.

Dihang gikiha ni Rondez silang ABC President Eugenio Faelnar ug kaubanan atubangan sa Visayas Ombudsman, napun-an ang mga sakop sa board nga niawhag ni Faelnar nga bayran na lang si Rondez. Nadugangan pa gyod ang mga opisyal sa ABC nga nibali dihang nagkaklaro na nga mapasaka nang kaso sa Sandiganbayan nga segurong mosangpot sa ilang pagkasuspenso sa katungdanan.

* * *

Human nimando ang Sandiganbayan pagsuspenso nilang Faelnar ug kaubanan, nisamot ang tensiyon tali sa mga sakop sa ABC board. Usa sa mga opisyal nihunong na pagtambong sa mga tigom human niya tulisoka si Faelnar nga maoy responsible sa ilang bulilyaso.

Ubang mga opisyal sa ABC kumbinsido na nga naduhig lang sila sa pagpa-itoy-itoy ni Faelnar kang Cebu City Mayor Tomas Osmeña. Kinsa maoy ilang gidudahan nga maoy nagdiktar ni Faelnar nga di pagbayad ni Rondez sa iyang mga benepisyo. Tungod lang kay kumbinsido ang mayor nga si Rondez tawo nilang kanhi mayor Alvin Garcia ug kanhi ABC president Jose Navarro ug busa angayng silotan human napilde ang iyang mga amo.

Karong nasuspenso na sila, gisudyaan nila si Faelnar nganong wa kadupa si Osmeña nila.

* * *

Laing opisyal sa ABC may laing reklamo batok ni Faelnar. Nipasangil siya nga gilaktawan ang mga sakop sa board sa mahinungdanong mga transaksiyon nga gisudlan sa ABC. Nagduda gani siya nga ang tinuod nga nagduma sa ABC di na si Faelnar, kinsa gihulagway nga mas nalinga sa iyang mga bisyo ug ubang laag, kon dili ang usa sa mga tinudlo ni Faelnar.

Sa usa ka tigom nga gitambongan sa pipila ka sakop sa ABC board, gikatahong diriyot matuok sa masuk-anong opisyal ang pinalabi ni Faelnar. Ug inay atubangon ang krisis sa iyang liderato, si Faelnar igo lang nagpahibawo usa ka adlaw dayong patuman sa tulo ka buwan nilang suspenso nga mobakasyon siya.

* * *

Maong hingpit nga nahugno ang mga opisyal sa ABC. Gawas nga wa matinuod ang pasalig sa ilang mga abogado nga mabasura ang mga kaso ni Rondez batok nila, wa sab matuman ang laing pasalig nga igo lang silang masuspenso sa ABC board ug makapadayon sa ilang mga gimbuhaton pagka kapitan sa ilang mga barangay.

Gawas ini, duna pa gyoy laing kaso nga gipasaka nilang Rondez ug kaubanan tungod sa kapakyas sa board paghatag sa ilang termination benefits. Di pa na igo, ang nipuli ni Faelnar pagduma sa Guadalupe mao ang numero unong konsehal nga iyang giapiki kay dugay nang giisip nga hulga sa iyang liderato.

* * *

Email: [email protected]