EDITORYAL - Emerhensya nasyonal

Giproklamar ni Presidente Gloria Arroyo ang State of National Emergency adtong miaging adlaw. Gikasuko kunohay kini sa mga gitawag nato nga cause oriented group ug mga militanteng pundok.

Miingon kitang "kunohay" kay ang labing tinuod mao nga gikalipay kini sa maong sektor sa atong katilingban.

Ilang gikalipay kay, sa unang lugar, mibunga na gyud ang ilang pagsamoksamok. Aslom nga bunga, apan bunga.

Sa ikaduhang lugar, ila kining gikalipay kay sayod sila nga ang pagdeklarar ni Mrs. Arroyo sa State of National Emergency nakahaling og samot sa kainit sa ulo niadtong mga tawo nga anaa sa hanay sa oposisyon. Ug magsamot usab kasamok ang kahimtang sa atong katilingban.

Mao kanay pangagpas sa pipila ka mga tigpaniid sa dagan sa politika diin nahilakip na karon ang walhong sektor

Matud pa ni Ms. Carmen Oppulencia, usa ka political scientist, "Ayaw mo pagtuo nga gikasuko sa political opposition ug sa ilang kasagabay ang pagproklamar sa Presidente sa State of National Emergency kay ila kining gikalipay. Maoy ilang gipaabot. Miresulta na ang ilang pagsamoksamok sa kadalanan."