Balibad sa tabang?

Padayong nagbaha ang mga hinabang sa mga Sugbuanon sa Kapamilya Relief Campaign sa DYAB Abante Bisaya alang sa mga biktima sa katalagman sa Southern Leyte. Apan nakabantay ko nga inay mohangop sa tanang gitanyag nga hinabang, ang kadagkoan sa St. Bernard, ang lungsod nga nawad-an og barangay tungod sa pagtabon sa usa ka bahin sa bukid sa Kan-abag sa Guinsaugon, nagkalingaw og pamalibad.

Dihang gipahibawo sa among plano pagda sa labing maayong mga doktor ug mga dentista sa Sugbo alang sa medical ug dental mission sa St. Bernard karong Sabado, ang lokal nga mga opisyal gikatahong nitubag nga wa magkinahanglan og mga tambal ang kaliboan ka mga bakwet. Nadasonan ni sa kasayuran nga among nadawat nga bisan ang ubang kahugpongan sa mga doktor sa ubang bahin sa Leyte gibalibaran sab.

* * *

Sayon ra unta kaayo ang pagsibog sa among plano ug pagtingob na lang sa among panahon pagpamutos sa mga hinabang nga pagkaon gikan sa mga Sugbuanon aron mapada sa labing daling panahon ngadto sa mga biktima di lang sa katalagman sa Guinsaugon kon dili hasta na sa mas lapad nga pagdahili sa yuta nga nakaigo sa labing minus 10 ka lungsod sa Southern Leyte. Apan nakakita ko sa tinuod nga kahimtang sa mga biktima sa hagip-ot kaayong evacuation centers.

Gawas sa kahuot nga nisangpot na sa kagid ug peskat sa pipila ka bakwet, ang labing dako nilang problema mao ang kakuwang sa kahimanan sa pagluto sa hinabang nga mga pagkaon nga ilang nadawat. Pipila sa mga biktima napugos na lang intawon pagkilaw sa bugas ug noodles kay wa silay kaldero ni kusina nga kalung-agan. Kon naproblema sa panglawas ang mga molupyo nga dunay ilang kaugalingong mga pinuy-anan, nganong likayan man sa sakit ang evacuation centers nga may usa ka kuwartong gipapuy-an og 31 ka pamilya?

* * *

Nasobrahan na ba gyong hinabang sa mga biktima? O nitoo lang ang mga opisyal sa St. Bernard sa ilang propaganda nga kontrolado nilang sitwasyon ug naatiman ang tanang panginahanglan sa mga bakwet?

Ang labing uwahing taho ni Rico Lucena sa TV Patrol Central Visayas mao nga nangalisbo na sa kabaho ang evacuation centers. Tungod ba ni kay way sakit? O sa mga hinabang nga nangalata kay way klarong sistema pag-apod-apod? O hinungaw sa tinuod nga pait nga kahimtang sa mga biktima nga gustong tagoan sa lapok sa pamakak sa ilang mga politiko?

* * *

Ambot madayon pa bang medical ug dental mission sa St. Bernard. Mag-agad ko sa management sa ABS-CBN ug sa mga doktor sama nilang Dr. Wyben Briones ug Dr. Fidelis Quiza.

Apan kon akoy pangutan-on, ako moingon: Kon abugon mi sa evacuation centers, mangalagad mi sa gawas diin may mga molupyo nga bisan di bakwet mahinangop inay maghilas-hilas pagbabag sa libreng konsultasyon ug mga tambal.

* * *

Email: [email protected]