Mopuli ang mga suspek

Mga suki, adunay nag-text kanako nga mikompirmar nga ang modus sa pagpanawag sa telepono diin ang nanawag mopatuo nga naospital ang amahan o inahan sa gitawgan tinuod gayod nga nahitabo ug adunay nabiktima niini.

"Kanang manawag nga moingon nga naospital ang papa o mama sa prospek, modus man kana," nagkanayon ang atong texter nga nanag-iya sa cellphone number 0926-2662101

* * *

Matud pa sa maong texter, klaro kaayong modus kini ug ang prospek ra maoy bantayan sa mga suspek. Base sa iyang text kanako, akong napangagpas nga ang mga suspek morag diha ra manawag sa duol aron makabantay gayod sila sa lihok sa mga tawo sulod sa balay nga ilang gitawgan.

Ang estilo, adunay manawag og mopatuo nga may daotan nga nahitabo sa imong amahan o inahan ug padad-on ka og kuwarta ngadto sa ospital. Tungod lagi kay ingon sa emerhensiya ang balita, magdali-dali sab intawon ang mga prospek, sa pag-adto sa tambalanan nga itug-an sa nanawag.

Kon makabiya na gani ang mga 'tagtungod' kunohay sa naospital, ang mga suspek mosulod sa pinuy-anan sa ilang prospek. Kon adunay nahabilin nga tawo sa balay, kini na usab ang ilang dramahon. Mopatuo sila nga sinugo sa naospital ug ipadala kuno kanila ang mga appliances sama sa TV ug daghan pang uban.

"Motuo sab ang nahabilin," nagkanayon ang atong texter. "Kawaton nila ang mga butang."

Pagbantay kamo niining maong estilo sa modus operandi. Kamo ray bantayan niining mga tawhana human sila makapanawag. Kon makabiya na kamo sa balay, mopuli sila pagsulod sa balay aron pagpangawat.

* * *

Sa laing bahin: "Good day. Unsa man nang Smart nga bag-o pa gani kong nag-load og P30, gikawat dayon ang P15? Pastilan!" -- 0921-4624596

Mao lagi kini ang makapahisagmuyo pag-ayo. Daghan na gayod kaayo ang mga reklamo nga midangat dinhi ning ubos kong lindog. Nagtuo kong dili lang dinhi sa akong kolum midangat ang mga reklamo kondili sa uban usab nga mga outlet.

Pero hangtod karon nagpabilin kining suliran sa misteryosong pagkahanaw sa mga load sa cellphone nga wala magamit o wala gamita. Wala usab ipasabot sa hingpit sa mga network provider kon unsay lintunganay nga hinungdan niini. May taphaw silang pagpasabot apan wala makombinser ang mga biktima nga mao gayod kini ang lintunganay sa tanan.

(Sumbong ug reklamo? Text sa 0910-8105522)