Apiki si Yap

Nasang-at na sa rehiyonal nga buhatan sa Civil Service Commission (CSC-7) ang ilang nahipos nga upat ka kopya sa gikagubtan nga charter sa Mactan Cebu International Airport Authority (MCIAA), ang Republic Act 6958 nga gipangamhanan nilang Kongresista Raul del Mar ug kanhi senador John Osmeña, ngadto sa ilang ulohang buhatan. Sa upat, ang kopya ra gikan sa Department of Transportation and Communication (DOTC) ang naglakip sa gikuwestiyon nga probisyon nga gikinahanglan ang nominasyon gikan ni Pres. Arroyo sa di pa matudlo si bisan kinsa pagka general manager sa MCIAA. Ang laing tulo managsamang nipatigbabaw sa panginahanglan sa career executive service office (Ceso) eligibility.

Samtang magpaabot pang CSC-7 sa opisyal nga kopya sa balaod gikan sa Kongreso, nisamot kalig-on ang pagduda nga mini ang balaod nga gipasikaran sa pagpatigbabaw ni kanhi CSC commissioner J. Waldemar V. Valmores sa pagkatudlo ni MCIAA General Manager Adelberto Yap. Nakapait kay wa na si Valmores sa CSC aron pagtubag sa iyang pagbaya o pakigkonsabo gyod sa maniobra.

* * *

Samtang mabinantayon kaayong nibalikbalik nga di niya mahimong unhan ang hukom sa commission en banc, si CSC-7 Director David Cabanag Jr. nitug-an sa DYAB Abante Bisaya nga kon mapamatud-ang gibuot-buotan ra pag-usab ang kopya sa balaod nga gisumiter sa DOTC, mapugos ang mga sakop sa MCIAA Board pagbakwi sa appointment ni Yap ug pagpili kinsa sa laing duha ka aplikante nga pulos dunay Ceso III eligibility ang itudlo puli sa mabakanteng katungdanan.

Gawas nga mapalagpot sa katungdanan si Yap, wa sab isalikway ni Cabanag ang kahigayonan nga dunay mapasakaan og kasong falsification of public documents. Susihon na lang kon kinsay malisyusong nipakapin sa probisyon nga maoy gihanig sa kuwestiyonableng pagkatudlo ni Yap: Si DOTC Secretary Leandro Mendoza ba o giilad ra sab siya sa ubang mga tawo, apil na ni Yap mismo.

Morang umang ang pakisusi sa CSC apan ila nang napamatud-an sa ilang pagtaktak ni kanhi general manager Angel Verdan nga ikapatigbabaw nilang balaod bisan batok sa labing gamhanang mga padrino.

* * *

Usa ka sakop sa MCIAA Board, nga nihangyo nga di lang ilhon, nipasabot nako nga gilab-as nilang pagkatudlo ni Yap bisan kadudahan ang iyang mga dokumento tungod sa (1) maayo niyang pagduma sa MCIAA ug (2) mahinungdanong pagpangandam alang sa ASEAN Summit unyang Disyembre.

Ang unang sukaranan mao say ilang gigamit sa pagdupa ni Verdan niadto; ang ikaduha taphaw gawas lang kon mangugat sila nga way laing kamao pagpalambo sa tugpahanan gawas ni Yap. Gawas pa, niangkon ang opisyal nga nagkahiusa silang tanang sakop sa board paglugway sa appointment ni Yap, nga mapupos na karong Pebrero 22, sa way pagsusi kon nakakuha ba siyag lab-as nga nominasyon gikan sa presidente.

* * *

E-mail: [email protected]