EDITORYAL - Ning adlaw sa gugma

Valentine's Day karon adlawa. Adlaw sa kasingkasing. Adlaw sa gugma.

Makaayo tingali natong tanan kon atong pahimudsan ning adlawa pinaagi sa pagpakita nato sa atong gugma dili lang sa atong bana/asawa ug kaha sa atong mga uyab o hinigugma kundili usab sa atong kahigalaan ug mga silingan.

Matud pa bitaw ni Shakespeare, ang gugma kuno maoy makapatuyok-tuyok sa kalibutan.

Sa ato pa grabe gyung ka gamhanan o makagagahum sa gugma ug kon ato kining gamiton ngadto sa ubang tawo hayan moresulta kini sa kahusay ug kalinaw nga sa dugay nang panahon maoy gikinahanglan sa atong nasud.

Busa ning adlaw sa gugma dili kay adto ra nato ipunting ang atong atensiyon sa atong bana o asawa o kaha sa atong hinigugma kundili usab sa ubang katawhan sa tinguha nga mawala ang mga kaligutgot ug mobanos ang pagminahalay.