| Bro. Andrew ma. Almonte, Mmhc |
Usa ka diskontentong sayaw ang mihangyo sa usa ka diwata nga unta ilisdan ang iyang mga pako. Tungod sa kaluoy, giilisdan ang pako sa maong sayaw sa pako sa agila. Human sa pipila ka mga takna sa paglupad-lupad, nibalik ang sayaw ngadto sa diwata og niangal sa mga pako nga bag-ohay pa lang giilis kaniya. "Palihug ilisi kining mga pako sa agila. Dili kini magsilbi kanako." Busa giilisdan kini sa diwata og mga pako sa banog. apan mao lang gihapon ang nahitabo. Miangal lang gihapon ang maong sayaw. Bisan unsa na lang mga pakoa ang giilis apan angal lang gihapon ang sayaw. Busa gihatag na usab sa diwata ang laing matang sa mga pako. Ning tungora, nakalupad na gyud ang sayaw sa tumang kasayon. Giduol sa sayaw ang diwata og gipangutana: "Unsa mang matanga sa mga pako ang imong gihatag nako nga sayon ra man alang nako ang paglupad?" Ang diwata mitubag: "Pako sa Sayaw."
Dili dautan ang moangal apan angay'ng tan-awon pud sa hingtungdan nga dili gyud magpulos ang bisan unsa nga pangayoon kon kini dili mohaom sa tinuoray natong panginahanglan. Kay dili mahitabo nga mangandoy kang mamahimong inahan kon ikaw usa ka lalaki.