Pamalandong matag Domingo
Pebrero 12, 2006; Ikaunom nga Domingo sulod sa tuig
Mga Pagbasa: Lv. 13:1-2, 44-46/1 Cor. 10:31-11:1/Mk. 1:40-45
Ang kahulogan sa pagbaton og sanla sa kapanahonan ni Jesus, mao nga isipon kang hawa, sa katilingban sa mga Israelita og ang imong presensiya butang nga gikalisangan sa imong mga kaigsuonan. Ang mga Israelita hadlok sa mga sanlahon dili lang tungod sa pisikal nga hinungdan (sila unya matakdan) kondili tungod sa balaod sa Pagpanlinis (ritual purity) sanglit giisip man nga ritually impure ang mga sanlahon. Mao nga dili sila mahimong makatambong sa bisan unsang kasaulogan og mamahimo silang "sinalikway" diha sa pundok sa ilang katilingban. Sa dihang giayo ni Jesus ang sanlahon, iyang gihimo nga ang maong tawo mahibalik sa kanhi niya kahimtang diha sa katilingban. Aron pagmatuod niini, iyang gisugo ang sanlahon nga magpahiling sa mga pari sanglit ang mga pari ra man ang makapamatuod nga ang tawo nga nahiagom sa sanla naayo na og nga mamahimo na siyang mahibalik sa katilingban og relihiyosong pakiglambigit. Kitang mga tawo, dili gayud gusto og bisan unsa nga makapahugaw kanato. Kay matud pa bitaw: "Cleanliness is next to Godliness." Adunay nindot og makahuloganong lakang nga gihimo si Jesus diha sa pag-ayo sa sanlahon. Iya kining gihikap timaan nga ang Dios wala diay magpalayo kanila nga giisip nga mahugaw segun sa pagtan-aw sa Balaod sa Pagpanglinis.
Ambot lang kaha nga ning kapanahonan ta karon, iyahay man lang kita og tulisokay og hukmanay sa kahugawan nga gihambin sa matag usa kanato. Sama pananglit sa Ultra Stampede Tragedy didto sa kaulohan, diin wala ug tuo ang pagtulisok sa mga nahilambigit sa programa sa Wowowee. Kinsa may angayang basulon? O tingali kay tungod sa "kultura sa Pangyawat" tungod sa naghinobrang kapit-os sa panahon karon mao nga daghan hinuon ang nangamatay didto sa Ultra. Sa akong pagpamalandong niini, daw sa nahigmata ako nga dili gyud diay maayo ang mopunay lang og hukom og mo-label sa uban nga mga "hugaw og mga sagbot." Kini tungod kay sama kanila ako pud kagawon. Ang salida nga:" The Excorcism of Emily Rose" nagpahinumdom nga: matag usa diay kanato dunay kaugalingong mga demonyo diha mismo sa sulod nato. Mao nga dili maayo nga mo-quarantine ta sa mga kagaw sa uban apan wala makapakgang sa atong kaugalingong mga kagaw!