Wala nay bili ang moralidad sa mga batan-on karon

Sa kanhiay nga panahon ang mga kadalagahan ug kaulitawhan nagbaton ug nag-amping sa kabililhon sa moralidad sa tawo. Sila mahadlok ug maulaw nga magginunitay sa kamot kun holding hands sa publiko, naglikay sa eskandalo. Sila nagbaton og moral values ilang gisunod ang sulondon nga hiyas gihuptan ni Maria Clara.

Sila kaniadto kun magromansa kun magpinarayganay adto kini nila pagahimoa sa tago kun hilit nga dapit kanang walay makakita kanila sa ilang pagminahalay.

Apan karon daku na kaayo og kalainan. Ang mga batan-on karon labina gayod unta ang mga estudyante angay unta magbaton sa kaulaw ug moila sa kabililhon sa moralidad sa pagkatawo.

Kadaghanan sa mga kabatan-onan karon wala kanila ang kaulaw ngadto sa publiko. Karon atong makita ug masaksihan ang mga kabatan-onan sa walay kaulaw mohimog eskandalo bisan anaa sa publiko sa mga sakyanan de pasaheroan. Sila law-ay kaayong tan-awon nga magginaksanay ug hugot kaayo, maghagkanay, mag-agbayay sama sa mga magtiayon. Nawad-an na sila sa kaulaw ilang buhaton ang pagromansa bisan asa na lang ug kita kaayo sa mga tawo.

Kining maong kahimtang atong makita sulod sa Mall, sa sakyanan publiko, sa sidewalk ug uban pa. Dako kaayo kining eskandalo ug makapuling tan-awon sa kauban nilang mga sumasakay pagbuhat sa ingon. Kun miila pa lang unta kining mga kabatan-onan karon sa moral values, maulaw unta sila.

Tingali makaingon kita nga kining ilang pagka wala nay kaulaw sa paghimo sa malaw-ay nilang buhat, resulta na kini sa paggamit nila sa naghitak karon nga gidili nga mga drogas nga naghitak na karon bisan asa. Tungod niini kadaghanan sa mga batan-on gipaka walay bili na lang ang moralidad. Nahisama na lang ang ilang mga kinaiya sa mga mananap nga maghimo sa eskandalo nilang binuhatan bisan pa atubangan sa publiko.