Palusot ni Yap?

Nag-anam kalig-on ang mga sukaranan sa pasangil nga palusot ray puhonan sa pagpilit ni Heneral Adelberto Yap isip general manager sa Mactan-Cebu International Airport Authority (MCIAA). Nahibaw-an sa Civil Service Commission (CSC) nga gikan sa Department of Transportation and Communication (DOTC) ang kadudahang kopya sa charter sa MCIAA (Republic Act 6958) nga maoy gipasikaran sa baruganan sa CSC nga makahimo si Yap pagpabilin kay, bisan wa siya maghupot sa gikinahanglan nga career executive service officer (Ceso) eligibility, siya ray dunay nominasyon gikan ni Pres. Arroyo.

Ang mga kopya sa balaod gikan sa opisyal nga tinubdan nga gipangayoan og tabang sa CSC managsamang nagmando nga way si bisan kinsang matudlo isip general manager sa MCIAA kon way Ceso III eligibility. Ang kopya ra nga gikan sa DOTC ang may probisyon nga ang nominasyon gikan sa presidente, gawas sa eligibility, maoy usa sa mga panginahanglan sa gikagubtan nga katungdanan.

* * *

Kinsa may naglawog sa CSC sa gibuotbuotan pag-usab nga balaod? Si DOTC Secretary Leandro Mendoza ba nga maoy nipasaka sa motion for reconsideration human gisalikway sa CSC ang pagtudlo sa MCIAA Board ni Yap? O si Yap ba gipasanginlang nidangop na sa salawayong mga maniobra-apil nang paglubag sa mga balaod ug pag-ilad sa iyang amo nga wa igdungog nga suhito sa balaod-aron lang di mapalagpot bisan kon nahagbong siya sa pasulit nga mao untay mohatag niya sa gikinahanglang eligibility?

Pahoy ba lang sang CSC nga nilamoy sa basura nga gilawog ni Mendoza o ni Yap nila? Si CSC Commissioner J. Waldemar V. Valmores nga maoy nagpakanaog sa hukom nga dapig ni Yap wa na sa komisyon. Napupos nang iyang termino ug wa na lab-asa ang iyang pagkatudlo. Tanga ba lang si Valmores o kabahin siya-ug ang nagkapupos niyang termino sa CSC-sa paugat paglansang ni Yap sa gikahinangpan kaayo niyang lingkoranan?

* * *

Mahimong malangay ang imbestigasyon sa gidudahang mga anomaliya sa Cebu State College of Science and Technology (CSCST) nga gipasiugdahan sa Board of Trustees (BOT), ang labing taas nga ahensiya nga nagduma sa kontrobersiyal nga eskuylahan. Gitagalan sa BOT ang iyang gitukod nga fact finding committee og hangtod sa Pebrero 15 pagtiwas sa pakisusi tinuod bang (1) gihimo nang diploma mill ang CSCST, (2) nangobra ang kadagkoan og makabungog nga honorarium nga gideklarar nang ilegal sa Commission on Audit ug (3) gikawkaw nilang Dr. Jose Sal Tan ang panudlanan sa CSCST.

Pero ang mga imbestigador nasangit tungod sa kalangay nilang Tan paghatag sa gikinahanglang mga dokumento. Kini bisan kon gitudlo sa secretariat sa komitiba si Dr. Willy Mulla, nga gihulagway nga usa sa mga itoy ni Tan ug usa sa gilambigit sa inanay nang nakalimtan nga eskandalo sa Perdido Lex sa Kapitolyo sa Sugbo.

* * *

Email: [email protected]