Commercial E-mail

Kay nasugdan na man gayod nato pagtuki ang nagkadaiyang modus operandi sa mga badlongon sa katilingban nga ipaagi sa e-mail, ato na lang gayod kining pahinaykan paghisgot. Diha god sa internet nagbaha ang gitawag og 'too-good-to-be-true offers". Bisan tuod nga may mga offer diha sa internet nga mapuslanon alang sa tawo, magamit usab kini sa mga tawong daotan sa pagbiktima sa ilang isigkaingon.

Kon aduna ikaw ing e-mail account, usa ka posibleng makadawat og spam-unsolicited commercial e-mail. Ang spam sagad nagtanyag og maayong mga serbisyo ug kahigayonan sa pagpanguwarta, apan aduna usay pipila niini nga lansis ug pangilad lang. Kon ikaw moresponde sa usa ka unsolicited e-mail pinaagi sa pagpadala og kuwarta bugti sa itanyag nilang produkto o serbisyo, posibleng mahasulod ka sa laang sa mga mangingilad.

Mahimong kining maong estilo sa pangilad wala pa mauso dinhi sa Pilipinas karon. Apan sanglit aduna may internet dinhi sa atong nasud, dili kita hingpit nga luwas niining maong modus. Dagsang na kaayo kini sa ubang kanasoran. Gani, gitaho man sa US Federal Trade Commission nga maoy paboritong biktimahon kadtong mga tawo nga nagbaton og bank account o ba kaha credit card.

Ang estilo mao nga mosulod sila sa imong balay o opisina sa desenteng pamayhon. Magpaila nga representative sa usa ka banko o sa usa ka credit card protection agency. Motanyag silag serbisyo aron (kuno) kaprotektahan ang imong bank account ug credit card batok sa bisan unsang tinonto. Sa laktod, aron kapanalipdan ang imong kuwarta nga wala sa imong mga kamot.

Pasabton ka nila nga karong panahona aduna nay daghang tinonto. Busa kinahanglan kunong protektahan ang imong account aron kon mawagtang kini, kawaton o mahiagom sa kadaot, makalaom ka nga dili mawagtang ang imong kuwarta pinaagi sa serbisyo nga ilang gitanyag kanimo.

Kon mopatol ka sa ilang bolada, ilang pangayoon ang imong bank account number, credit card number o bisan unsang laing personal information nimo. Human nimo ikahatag, may papeles kang pirmahan isip pagmatuod nga mi-avail ka sa ilang serbisyo. Mangayo pag service fee (dili hinuon dako).

Wala ka lamay kasayoran nga ang imong pagsalig kanila maoy nagdoot kanimo sa kaalaotan. Kay human mo ikatug-an kanila ang tanang impormasyon bahin sa imong bank account o credit card, mahimo na kini nilang hilabtan o kuhaon ang kuwarta o gamiton kini sa kaugalingon nilang transaksiyon. Busa, pagbantay!

Text sa 0910-8105522. E-mail: [email protected].