Holiday para ni Pacquiao

Usa ka dakong hagit ni Cebu Customs District Collector Ma. Lourdes Mangaoang ang pagkab-ot sa P5.303 bilyones nga target collection nga gi-assign sa Port of Cebu.

Ang 'rate' sa taripa sa buhis alang sa imported nga kargamento nag-anam na og kunhod. Tingale, labing gamay nga rate karon sa taripa anaa sa uno porsiyento ug labing taas na ang tres ngadto sa siyes porsiyento.

Apan bisan pa man niini, ang ulohang buhatan sa Bureau of Customs, ubos sa pangamahan ni Customs Commissioner Napoleon Morales, andam mokab-ot sa gidestino sa Department of Finance nga target collection sa kinatibuk-ang adwana sa nasud nga P190.452 bilyones.

Gawas sa koleksiyon sa mga buhis sa mga imported nga kargamento, adunay dakong pandayonon si Mangaoang sa iyang puwerto. Adunay daghang mga opisyal diha nga 'duplicate' na sa 'existing' na nga opisina.

Daghan gihapon ang mga hao shiao nga nanginabuhian sa adwana nga angayang susihon sa pamunoan ni Mangaoang. Hinuon, gipasalig ni Morales sa press conference atol sa inugurasyon sa bag-ong customshouse niadtong Sabado nga aduna siyay tahasan nga team nga motan-aw sa maong suliran sa mga nanarbaho sa adwana sulod sa dugay nang katuigan apan wala pa gihapon makakuha og 'item' sa plantilla.

* * *

SMUGGLING. Apan ang labing dakong hagit ni Mangaoang mao ang pagpuo sa smuggling sa Port of Cebu.

Kay walay nangasakmit nga mga kargamento, nagpasabot ba kini nga wala nay smuggling sa Cebu?

Ambot unsa katinuod ang report nga atong nadawat nga adunay examiner nga nakadestino sa Mactan Export Processing Zone (MEPZ) sa Lapu-Lapu nga bantayanan ang mga lihok tungod sa taho nga pirme na ang "swing operations" gamit ang mga ngalan sa mga lehitimong locators isip consignee sa gipalusot nga mga kargamento.

Maayong susihon ni Mangaoang kining maong report.

Laing susihonon niya ang duties nga gibayad nianang mga scrap metal sa West Cebu Industrial Park sa Balamban ug Mitsumi nga wala na ma-report. Unom ka bulan sa miaging tuig, na-reported ang kapin P3 milyones nga buhis gikan sa maong duha ka kompaniya nga nasulod sa special economic zones.

Maayong patubagon niini si Collector Allan Umali, ang kolektor nga nakadestino sa MEPZ ug special economic zones.

* * *

PACMAN HOLIDAY. Unod sa mga debate kagahapon ang paghimo og holiday sa adlaw nga pag-abot ni Manny Pacquiao dinhi sa Pilipinas human niya gipalukapa si Erik Morales sa ilang "The Battle" didto sa Thomas and Mack Center sa Las Vegas, Nevada.

May mga kampo nga gusto gyud nga himuong espesyal ang Enero 27, ang adlaw kanus-a maabot ang bag-ong bayani sa nasud nga Pilipinhon, samtang may mga kampo nga nagkanayong walay igong rason nga hatagan og samang pasidungog si Pacquiao sa mga nasudnong bayani nga nangamatay na.

Kining holiday na-uso na kini sa panahon pa sa kakaraanan. Sa nasud nga Greece, ang holiday itagana gayod sa gobyerno aron ang mga tawo mahatagan og higayon nga magmaya pasidungog sa ilang ginoo (gods and goddesses). Dinhi niining mga panahona manggawas ang labing tanlas nila nga bino, mag-ihaw og mga hayopan aron saw-an. Tukar, sayaw, babaye, inom, kaon, ug singgit-singgit maoy madunggan ug maaninaw.

Niining kasamtangang panahon, ang mga nasud sama sa Pilipinas misagop niining holiday aron pagpasidungog niadtong mga tawo nga nakatampo pagprotehir sa dungog ug kagawasan sa inahang-nasud. Gitawag nato sila og national heroes.

Ang nasudnong bayani, sa context sa modernong panahon, dili lang kay kadtong mga tawong mi-alsa batok sa mga langyaw'ng misakop sa nasud, gipatay ug nagpakamatay sa ngalan sa kagawasan, hustisya ug kaangayan. Lakip na kadtong mga tawong may natampo sa natad sa awit, sining, arte, teknolohiya ug medisina giisip na nga bayani.

Dili malalis ug wala gyuy mosulay og lalis nga si Pacquiao apil na sa linya sa mga nasudnong bayani tungod sa nahatag niyang kadungganan sa Pilipinas nga mipaka ug nalilok sa ubang kanasuran tungod sa iyang talagsaong kahanas sa pamoksing.

Dili man sayop ang paghatag kaniya og pasidungog. Apan sobra ra kaayo kanang holiday. Mismo tingale si Manny dili mosugot sa daw "tunglo" nga paagi nga pasidungog nga gisugyot ni Senador Ramon "Bong" Revilla Jr.

Daghan pang mga paagi nga mapakita sa mga Pilipino ang ilang pagpadayag sa pahalipay ug pasidungog ngadto kang Pacquiao.

Wala gihapoy gamit kun himuong holiday ang Enero 27 kanus-a maabot si Pacquiao tungod kay ang mga tawo walay kuwarta nga ikaselebrar ug ikamaya sama sa buhaton sa mga Grego sa karaang panahon. Kutob ra ta sa pagpuyo sa balay kay walay aloy, unya luoy pa kaayo kadtong giinadlawan og suweldo kay kun holiday, unya wala silay trabaho, sa ato pa wala silay madawat nga suweldo sa maong adlaw.

Ang mga tinun-an mabalda pa sa ilang pagtuon.

Gawas pa, daghan na kaayo kita og holiday dinhi sa Pilipinas. Sapayan lang gani nga pagatawgon kita og "holiday country" kay naila naman kita nga "fiesta republic" sa ubang mga nasud tungod sa kadaghang piyesta nga atong gisaulog.

Wala gyud koy supak sa pasidungog alang kang Pacquiao tungod kay sibo lamang kini alang kaniya nga nakapahiusa kanatong mga Pilipino bisan usa lamang ka adlaw. Pero pangitaan lang nato siya og laing pasidungog, ayaw lang nang holiday.