Makauuwaw

Laing kaso batok sa usa ka gidudahang drug user ang gisalikway sa hukmanan tungod sa rason nga wala magkapareho ang pamahayag sa mga polis nga midakop sa akusado.

Tsk, tsk, tsk. Lain na usab kining palpak sa kapolisan nga nagpasagad na lang og luwat sa ilang pamahayag dihang gisukit-sukit sila sa hukmanan.

Si Jason Elic nadakpan nga matud pa nakuhaan og usa ka paketeng shabu atol sa usa ka checkpoint operation atubangan sa Pardo police station kaniadtong gabii sa Oktobre 16, 2003.

Ang nagkasumpaki nga pamahayag nila ni SPO4 George Aniñon ug SPO3 Joel Sanchez maoy nakahatag og kadaut sa kaso nga gipasaka nila batok sa akusado,

Usa ka polis nga si SPO2 Danilo Abella miingon nga ang nakadakop ni Elic mao si SPO3 Sanchez, apan wala siya masayod kon diin masakmit ang shabu gikan sa dinakpan.

Si SPO3 Sanchez miangkon nga siya ang midakop ni Elic tungod kay katahapan kini og linihukan ug misuway pagdagan gikan sa checkpoint.

Matud ni Sanchez nga human niya dakpa si Elic, iya dayon kining gitugyan ni Aniñon kinsa mao na ang nakakita nga ang dinakpan naghupot diay og shabu.

Apan dihang gisukit-sukit na si Aniñon atubangan ni RTC judge Gabriel Ingles, si Aniñon miingon nga si Sanchez maoy nakasakmit sa shabu gikan sa dinakpan. Unsa man g'yoy tinuod?

Pagkalibog baya ninyo uy!

* * *

Dili ba maayo nga kamong mga polis magtipig g'yod mo og kaugalingong "notes" sa matag ninyo operation?

Kini aron nga inyong tun-an sa dili pa kamo moadto sa korte kay sukit-sukiton kabahin sa inyong operation.

Isip beterano nga police reporter, unya karon anaa na madistino sa hukmanan, daghan na ko og ideya nga natan-aw nako nga makasulbad sa palpak sa inyong operasyon.

Dili ikalimod nga daghan kaayo mo og operation nga nasalmotan ug lisud na kini mahinumdoman iniglabay na sa daghang mga buwan, ilabi na og moabot na og duha ka tuig.

Apan kon duna mo'y notes, siyaro og makalimot mo? Kon duna man gani'y malimtan, kadto na lang mga detalyi nga dili na makadaut sa inyong gipasaka nga kaso.

Tiaw mo wala ninyo matataw pag-ayo kon kinsa ang nakasakmit sa shabu gikan sa inyong dinakpan. Mao na nga nahimutang nga kadudahan na ang inyong gipasaka nga kaso.

Masabot man god diha nga inyong gitumo-tumoan ang akusado aron lang g'yod mapriso.

Sigurado ko nga kon magtoon lang mo daan sa kaso sa dili pa moadto sa hukmanan, husto g'yod ang inyong tubag sa mga pangutana sa huwes o abogado.

* * *

Ang report nga giingong dunay tawo nga buot mopapatay ni Koronel Vic Loot ug sa iyang asawa nga si mayor Maria Luisa Loot, dili na bag-o alang kanako.

Bisan og wala pa itataw sa report sa mga sakop sa media, apan tataw na kaayo uy kon kinsa ang gipasabot.

Nasayod na usab ko nga si Koronel Loot, andam na kanunay kon dunay mobanhig o buot mopatay kaniya. Mao ni'y panag-ingnon nga sa makauna lang kanila.

Kitang tanan nakaila na man kon kinsa ang politiko nga kontra sa mga Loot diha sa kwarto distrito.

Hinuon, mora'g daw dili sab ko makatoo nga ila kining buhaton. Apan dunay panag-ingnon nga walay imposible sa usa ka butang.